Jaulkipen data: 11 urria 2006
Tradizioa eta abangoardia uztartu egiten dira dantza eta kantu flamenkoetan. Arte horren jatorria oraindik ez dago oso argi eta eztabaida ugari sortzen du gai horrek, baina ezin da ukatu oso errotuta dagoela Espainia osoan, Andaluzian bereziki. Batzuek adierazten dute flamenkoa herri arabiarrekin iritsi zela Iberiar Penintsulara. Beste batzuek, berriz, uste dute Indiatik etorri zela. Hala ere, Herbeheretatik emigratutako ijitoen bitartez iritsi zela ziurtatzen dutenek daukate sinesgarritasun gehien. Hortik datorkio, gainera, izena: flamenkoa. Jatorri bat edo bestea izan, Andaluzian errotu zen gehien, eta handik Espainiako gainerako tokietara zabaldu zen. Flamenkoa, dantza eta kantu flamenkoa, ezin da banandu orain Espainiako kulturatik. Hori dela eta, Filateliako 2006ko Munduko Erakusketako bloke-orri batean islatuta geratu da flamenkoa. Gainera, aurten Malagan du egoitza erakusketak, dantza eta kantu flamenkoa sortzen diren hiri eta gune garrantzitsuan. Horregatik, arte horretako bi adierazgarri handiren izenak —Cristina Hoyos eta José Mercéren izenak— seiluetan jasota geratuko dira betiko.
Cristina Hoyos Panadero flamenko-dantzari sevillarra hamasei urterekin espezializatu zen dantza flamenkoan, hainbat tablaotan lan eginda. 1969an, berriz, Antonio Gades ezagutu zuen, eta bere konpainian sartu zuen dantza-lagun gisa. 1974an, neskalagunaren paper nagusia antzeztu zuen Bodas de Sangre ikuskizunean. Ondoren, paper garrantzitsuak izan zituen antzerki-muntaietan, baletetan eta zineman, honako lan hauek oinarri hartuta: Carmen, El Amor Brujo, Montoyas y Tarantos, Yerma, Al compás del tiempo eta Tierra adentro. Ikuskizun horiekin birak egin zituen mundu osoan. Teknika bikaina da bere dantzaren bereizgarri. Oreka ezin hobea daukate, gainera, bere dantzaren sustrai sakonek eta modernotasunak. Hoyosek sari garrantzitsuak ditu; besteak beste, honako hauek: Dantzaren Sari Nazionala, Andaluziako urrezko domina eta Arte Ederren urrezko domina. José Mercé flamenko-kantari jereztarra Mercedeko eskolanian hasi zen abesten, eta hortik datorkio izen artistikoa. Hamabi urte zituela, debuta egin zuen Jerezeko jaialdi flamenkoetan. 1973an, Gadesen konpainiako kide izatera pasa zen, eta mundu osoan zehar egin zituen birak konpainia horretan. Hainbat ikuskizunetako protagonista izan zen Balet Nazionalarekin. Diskografia zabala du, eta 80ko hamarkadatik gaur egunera arte sari eta aitorpen ugari jaso ditu. Bloke-orria Jesús Sánchez estudioak diseinatu du.
A tarifa - 0,75 €. 20 g arteko Gutun edo Posta-txartel Nazional Arrunt “normalizatuak”.
A2 tarifa - 0,85€. 20 g-tatik 50 g-tara arteko Gutun edo Posta-txartel Nazional Arrunt “normalizatuak”.
B tarifa - 1,65 €. Europara zuzendutako (Groenlandia barne), 20 g arteko Nazioarteko Gutun edo Posta-txartel Arrunt “normalizatuak”.
C tarifa - 1,75 €. Munduko gainerako lekuetara zuzendutako (AEB, Kanada, Japonia, Australia eta Zeelanda Berria izan ezik), 20 g-ra arteko Nazioarteko Gutun edo Posta-txartel Arrunt “normalizatuak”.
D tarifa - 2,10 euro. AEBra, Kanadara, Japoniara, Australiara eta Zeelanda Berrira zuzendutako 20 g-ra arteko Nazioarteko Gutun edo Posta-txartel Arrunt “normalizatuak”.