Jaulkipen data: 11 martxoa 2019
HERRI XARMAGARRIAK
Laugarren urtez jarraian, Correosek gure herrialdeko herri xarmagarriei buruzko serie hau argitaratu du, Espainiatik munduko beste txokoetara bidalketetan erantsita bidaiatuko duena. Auspo-forma duen orri toles honek garai bateko posta-txartelak dakarzkigu gogora. Zigilu inprimatuaren atzealdea ere badakar txartel haien atzealdea bailitzan. Formatu tolesgarria lau zigilu autoitsaskorrek eta bineta batek osatzen dute.
Oraingo honetan, herri hauek aukeratu dira: Liérganes, Kantabrian, Covarrubias, Burgosen, Guardia, Araban eta Uxue, Nafarroan.
Liérganes Kantabriako herri bat da, eta bertan aurkitu diren lekukoak XVI. mendekoak dira. Liérganes esploratzean, hainbat eraikin ezberdinez gozatzeko aukera dago: barrokoak eta neoklasikoak; mendiko etxetzarrak eta jauregi indianoak; elizak, kaperak, ermitak, zubiak eta errotak... Eraikinak txandatzen doaz, estiloak eta aroak naturaltasunez uztartuz. Bere sekretutxoekin, eraikinek kontatzen digute Liérganesek bizitako garapena eta eboluzioa. Udalerriaren ipuin kolektiboa da; pixkanaka-pixkanaka, eskualdeko erdigune sozioekonomikoa bihurtu zen.
Covarrubias Burgoseko herri bat da, eta, aurkitutako arrastoen arabera, Paleolitikoan ere gizakiak bertan bizi izan ziren. Sinesmen baten arabera, bisigodoen aldikoa da San Kosmeren eta San Damianen eliza primitiboa. Denborak aurrera egin ahala, hirigune garrantzitsuenetako bat zen konderriko orden erlijioso, kultural eta ekonomikoan. X. mendean Covarrubias berriz sortu eta bertan kokatu ziren Larako kondearen ondorengoak. Jauregi bat zuten bertan; beranduago Fernán González izan zen Arlanzako San Pedro monasterioari jauregia eman ziona. XV. eta XVI. mendeak izan ziren udalerriaren maila gorena, Santo Tomaseko eliza eta kolegio-eliza berriz eraiki zituztelako; Burgoseko gotikoaren aberastasunaren eredu. Horrez gain, Fernán Gonzálezen jauregia ere berritu zen.
Guardia Arabako udalerri bat da. Inguruan arrasto arkeologikoak aurkitu eta aurkitzen dira; zantzu nabarmen horiek adierazten dute aspalditik eremu horietan jendea bizi izan dela. Kaleetan barrena galtzeko herria da; bere historia arnastekoa. Aurrera egin ahala, animatutako erlojuraino iristen da, gaur egun udalerriaren sinbolo dena. Erlojuak berak ematen die hasiera herriko festei, San Joanak, ekainaren 23an.
Uxue, berriz, Nafarroako ekialdean kokatuta dagoen Erdi Aroko herri xarmagarri bat da. Kokapen berezia du, Uxueko zerraren mendi baten gailurrean baitago. Antzinako etxe koloredunez osatua dago erdigunea, eta Santa Maria eliza-gotorleku baten inguruan daude (XI.-XIV. Mendeak), Uxueko gunerik altuenean. Nolakoak diren ikusita, badirudi oraindik ere zaldunen eta soldaduen soinu metalikoak entzuten direla harrizko kaletxo aldapatsuetan.
A tarifa - 0,75 €. 20 g arteko Gutun edo Posta-txartel Nazional Arrunt “normalizatuak”.
A2 tarifa - 0,85€. 20 g-tatik 50 g-tara arteko Gutun edo Posta-txartel Nazional Arrunt “normalizatuak”.
B tarifa - 1,65 €. Europara zuzendutako (Groenlandia barne), 20 g arteko Nazioarteko Gutun edo Posta-txartel Arrunt “normalizatuak”.
C tarifa - 1,75 €. Munduko gainerako lekuetara zuzendutako (AEB, Kanada, Japonia, Australia eta Zeelanda Berria izan ezik), 20 g-ra arteko Nazioarteko Gutun edo Posta-txartel Arrunt “normalizatuak”.
D tarifa - 2,10 euro. AEBra, Kanadara, Japoniara, Australiara eta Zeelanda Berrira zuzendutako 20 g-ra arteko Nazioarteko Gutun edo Posta-txartel Arrunt “normalizatuak”.