Animals en l art. Bous. Retaule de Sant Miquel de Prats

Animals en l'Art. Bois. Retablo de Sant Miquel del Prats

Un pequeno detalle do Retablo de Sant Miquel del Prats, no que se poden apreciar uns bois, é o motivo que ilustra o presente ano o selo da serie “Animals en l'Art”.
O motivo forma parte dunha das táboas do ático do retablo, que representa a escena da “Aparición ou milagre do Monte Gargano”, obra situada cronoloxicamente no gótico tardío, que se pode apreciar e recoñecer doadamente pola profusión de dourados, pero que ten a excepcionalidade de ter algúns detalles que anticipan o estilo renacentista, como a figuración dos personaxes.
O retablo está considerado como un dos expoñentes máis importantes da pintura do século XVI de Andorra.
A obra atribuírase ata hai pouco tempo a un autor ao que chamaban “Mestre de Canillo”, autoría que na actualidade se descubriu como dobre: por un lado, o pintor Miquel Ramells e, por outra, o dourador Guy de Borgonyó.
Grazas a uns documentos encontrados no “Arxiu Nacional d'Andorra” púidose coñecer a autoría da obra e así datar con precisión o momento en que esta se realizou, arredor do ano 1530. A obra realizouse con pintura á témpera, óleo e ouro sobre madeira de piñeiro.
O retablo estaba orixinalmente situado na igrexa románica de Sant Miquel de Prats, na parroquia andorrana de Canillo, e foi construída no século XII.
É un exemplo representativo do románico rural andorrano. De grosos muros formados por laxes de lousa e austera na súa aparencia, ten a singularidade de estar construída sobre un terreo con desnivel, polo que a ábsida e parte dos muros laterais quedan baixo terra, a excepción da fachada principal, que dá acceso ao templo. A súa pequena espadana de dobre van xunto coa paisaxe de montaña propia do Principado confiren á pequena igrexa un atractivo especial.
A principios do século XX, o retablo foi vendido a un anticuario que o revendeu á súa vez por pezas, algunhas das cales se recuperaron nos últimos anos e outras seguen en paradoiro descoñecido.
Nestes momentos consérvase “A caída dos anxos rebeldes”, a predela do retablo e a táboa da que se extraeu o motivo deste selo, “A Aparición do Monte Gargano”, adquirida no ano 2011 por Crèdit Andorrà e que actualmente pertence ao seu fondo de arte.
O selo recolle unha fotografía do fotógrafo andorrano Jordi Tena, quen orientou parte da súa obra a fotografar aqueles animais reais, fantásticos ou mitolóxicos, que están presentes no imaxinario artístico do Principado.