Personatges. -2021. Antoni Morell (1941-2020). Principat d' Andorra

PERSONATGES. Antoni Morell

Auga, vento, pedra e tempo, son os catro anacos cos que Antoni Morell esbozaba a identidade do pobo andorrano, aos que sumaba, por riba de todo, a persoa humana, como integradora de todos eses elementos que forxan a súa identidade.

A perda de Antoni Morell i Mora, o cinco de xaneiro de 2020, foi a perda dun intelectual, profundamente humanista, que ao longo da súa vida realizou unha profunda reflexión sobre a sociedade, a historia e o pobo andorrano.

Unha reflexión que se beneficiou da súa polifacética personalidade, que o levou a exercer de profesor, avogado, político, embaixador e sobre todo, escritor de novelas, ensaios e artigos en diversos medios.

Considerado como o pai da literatura moderna andorrana, salientan da súa obra tres novelas: “Set lletaníes de mort”; “Borís I, rei d’Andorra” e “La neu adversa” que conforman un retablo sobre a sociedade andorrana tradicional, baseada no fogar, a paisaxe e o rigoroso clima de alta montaña, e a economía de subsistencia.

A súa obra foi merecedora de diversos premios e recoñecementos como o Premi Carlemany, o Premi Sant Miquel d’Engolasters ou o Premi Manel Cerqueda.  A súa actividade literaria permitiulle cultivar a amizade con outros escritores como Salvador Espriu, Agustí Bartra ou Miquel Martí i Pol, entre outros.

Antoni Morell naceu en Barcelona, en 1941, fillo dun condutor de Alpicat (Lleida) e dunha andorrana, de quen herdou a súa nacionalidade. Recibiu un profunda formación humanística grazas ao seu paso por diversos seminarios en Barcelona, onde chegou a ser ordenado diácono. Posteriormente continuou os seus estudos en filosofía e historia moderna e contemporánea na Universidade de Zaragoza. O seu labor profesional comezou coa docencia, ata que en 1973 foi nomeado Secretari General de Sindicatura. Foi un dos pais do proceso de “andorranización” do Principado e impulsou a posta en marcha do Arxiu Nacional, a Biblioteca Nacional e o Institut d'Estudis Andorrans. En 1981 foi nomeado Secretari General do primeiro Goberno de Andorra e entre 2005 e 2010 exerceu de embaixador extraordinario e plenipotenciario do Principado na Santa Sé do Vaticano.