Data de emisión: 17 xaneiro 2005
Na serie Árbores monumentais aparece un selo dedicado ó ahuehuete, do parque madrileño do Retiro. O ahuehuete ou Taxodium mucronatum, tamén coñecido como ciprés de México, é orixinario de América do Norte. Esta árbore é unha conífera e unha das especies máis lonxevas do mundo. As súas follas son lanceoladas e alternas. Prolifera ó longo das marxes dos ríos; de aí que en terras mexicanas o seu nome signifique 'árbore vella de auga', debido á súa antigüidade e pola súa necesidade de auga. Como exemplo representativo de ahuehuete e das grandes dimensións que acada, tanto en altura coma en diámetro de tronco, citamos un exemplar situado no cemiterio de Santa María de Tule, preto de Oaxaca. É tal a abundancia de ahuehuetes no país azteca que no ano 1921, para celebra-lo centenario da independencia de México, foi elixida árbore nacional. Do ahuehuete, especie que tantas lendas inspirou e que foi utilizado con fins ornamentais, España posúe exemplares moi relevantes pola súa beleza e tamaño. De feito, nos xardíns do Príncipe, en Aranjuez, consérvanse fermosos exemplares desta árbore, tamén coñecida no noso país como sabina. Agora ben, o selo, como diciamos, ocúpase de dar a coñece-lo ahuehuete situado no parque do Retiro. Esta árbore, que conta cun tronco groso e con abundantes pólas que lle dan aparencia de candelabro, crese que foi plantada a principios do século XVII, xa que a súa existencia está documentada e forma parte do inventario do Bo Retiro correspondente ó mencionado século. Ten 300 anos e, se considerámo-la lonxevidade desta especie -entre 2.000 e 6.000 anos-, podemos afirmar que se trata dunha árbore nova. O ahuehuete do Retiro foi incluído en 1992 no Catálogo de árbores singulares da Comunidade de Madrid.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.