Data de emisión: 01 setembro 2005
Percorren as rúas das nosas vilas e cidades ataviados coas cores azuis e amarelas identificativas da institución postal; son os carteiros, protagonistas da emisión titulada Día do Selo e aos que se lles rende homenaxe con este autoadhesivo que se pon en circulación o 1 de setembro.
A orixe da profesión de carteiro xorde en 1756, coa creación en Madrid do oficio de carteiro maior e o nomeamento dos doce primeiros carteiros para o reparto dos doce cuarteis ou barrios en que se dividía a cidade. A ordenanza establecía a obrigatoriedade de saber ler, escribir e vivir dentro da demarcación do barrio de reparto. Así mesmo, autorizaba o cobro dun cuarto de real por cada carta entregada, con cuxa sobretaxa se creou un fondo para as súas retribucións. A diferenza doutros empregados da Renda, os carteiros non tiñan carácter de funcionarios nin cobraban do Erario público, característica que se mantivo durante case 200 anos. A norma establecida en Madrid serviu de modelo para as demais grandes cidades e pouco a pouco, co desenvolvemento dos servizos postais, os carteiros foron adquirindo dereitos e obrigas que se plasmaron nos distintos regulamentos publicados para cada provincia. Así, no Regulamento de carteiros de 1861 sinálanse as calidades esixidas para obter o nomeamento e establécese a recadación de cinco céntimos por cada carta, prego ou periódico entregado a domicilio. As retribucións facíanse semanalmente. Estas condicións non variaron ata a chegada da II República, momento no que os carteiros adquiriron a condición de funcionarios e pasaron a cobrar dos fondos públicos. A profesión de carteiro, sempre vinculada ao varón, fíxose extensiva á muller tras a aprobación da Constitución Española. En 1979, coa entrada en vigor da Lei de corpos de Correos e Telecomunicación, estableceuse que todos os españois, sen discriminación de sexo, poderían formar parte dos distintos corpos da institución, entre os que se encontraba o de carteiros, que nesa data pasaron a denominarse auxiliares de clasificación e reparto. Na actualidade, o colectivo de carteiros supera os 34.000 e a súa figura segue sendo emblemática e querida polos cidadáns.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.