Navidad 2005

A emisión dedicada ao Nadal 2005 consta de dous selos: un de tema clásico que reproduce a Adoración dos Reis, de Francisco Ribalta, e outro contemporáneo alusivo aos tres Reis Magos do pintor Pablo García López, coñecido como “Alexis”.Na emisión para este Nadal, como na de anos anteriores, volveuse impoñer a técnica pictórica e tanto nos motivos como nos pintores alternan os clásicos cos actuais.

A Adoración dos Reis do pintor Francisco Ribalta (Solsona, 1565-Valencia, 1628), está localizado e conservado na sancristía da basílica menor de San Xaime Apóstolo de Alxemesí e aparece reproducida no selo de 0,28 €. Mostra a imaxe, en primeiro plano, á Virxe co Neno sentado no seu colo, que é adorado por un dos Reis, mentres que os outros dos Magos permanecen xunto a San Xosé, nun segundo plano. Esta espléndida obra, xunto cunha Adoración dos Pastores, conformaba un conxunto de 19 pinturas do retablo maior da basílica de Alxemesí. O retablo foi realizado durante a estancia de Ribalta na capital valenciana. A Adoración dos Reis é un óleo sobre lenzo, pintado arredor do 1604, de estilo manierista e influencia italiana. Ribalta, iniciado no manierismo, optou por expresar a súa obra e evolucionar cara ao naturalismo tebroso do barroco.

O outro selo de 0,53 €, recreado nunha pintura do artista Pablo García López, que asina como “Alexis”, presenta a imaxe dos tres Reis Magos, mostrando os agasallos: ouro, incenso e mirra. Alexis, nacido en Zaragoza en 1969, cidade en cuxa Escola de Artes e Oficios se formou, póboa o seu universo de fantasía e imaxinación, de seres irreais ou personaxes surrealistas cuns trazos físicos e anatómicos que están máis próximos ao primitivo e animal que ao humano. Desde que se iniciou na pintura alternou na súa produción pictórica as paisaxes e as figuras, aínda que foi nestas últimas onde maiores logros obtivo, plasmando o racional e irracional das súas “criaturas”. Desde principios dos 90 a hoxe realizou varias mostras individuais e colectivas da súa obra en diversas galerías.