CAMPEONES DEL MUNDO DE BALONCESTO 2006

Correos dedica unha folla bloque á Selección Española de Baloncesto como recoñecemento á súa recente proclamación como Campións do Mundo 2006 en Xapón. A folla bloque mostra unha fotografía na que aparecen todos os xogadores do equipo de baloncesto, acompañados do seu adestrador, José Vicente Pepu. O selo, de 0,29 euros, reproduce motivos alegóricos deste deporte.

O XV Campionato Mundial de Baloncesto, celebrado en Xapón entre os días 19 de agosto e 3 de setembro, no que participaron 56 equipos e na fase final 24 seleccións nacionais, veu dar o triunfo a España e á nosa Selección Masculina de Baloncesto que gañou a Grecia, vixente campioa do Eurobasket. España e o seu equipo de baloncesto con este éxito escribiron a páxina máis brillante da historia do baloncesto español. A nosa selección conquistou a medalla de ouro tras vencer a Serbia (campioa do Mundo en 2002), a Lituania (campioa de Europa en 2003), a Arxentina (campioa Olímpica 2004) e a Grecia (campioa de Europa en 2005). O podio deste XV Campionato Mundial de Baloncesto de Xapón 2006 deu a medalla de ouro a España, a de prata a Grecia e a de bronce a Estados Unidos. Formaban a selección de España, dirixida por José Vicente Pepu, os xogadores seguintes: José Manuel Calderón, Carlos Cabezas e Sergio Rodríguez (bases); Juan Carlos Navarro, Rudy Fernández e Berni Rodríguez (escoltas); Carlos Jiménez e Álex Mumbrú (aleiros); e Pau Gasol, Felipe Reyes, Marc Gasol e Jorge Garbajosa (pívots). Os integrantes da nosa selección, tras erixirse en Campións do Mundo 2006, polo seu exemplo de espírito de equipo, superación das dificultades e compromiso cos valores do deporte que a selección transmitiu á sociedade, obtiveron o prestixioso Premio Príncipe de Asturias dos Deportes 2006. Ademais, a Federación Internacional de Baloncesto (FIBA) nomeou a Pau Gasol Mellor Xogador do Torneo (MVP) e, xunto ao seu compañeiro, Jorge Garbajosa, forman parte do Quinteto Ideal, configurado polo arxentino Emanuel Ginóbili, o grego Theodoros Papaloukas e polo estadounidense Carmelo Anthony. A Selección Española de Baloncesto, con este primeiro ouro nun gran campionato internacional, logra o maior éxito da historia. Ademais este triunfo referenda o excepcional momento que vive o baloncesto en España.