CENTENARIOSV centenario del nacimiento de San Francisco de Javier

A filatelia conmemora o V Centenario do Nacemento de Francisco de Xavier coa emisión dun selo que recorda a vida e a obra do máis universal dos misioneiros que, no século XVI, trabou fortes lazos de colaboración entre Oriente e Occidente.

Francisco Xavier, ou de Xavier, naceu o 7 de abril de 1506 no Castelo de Xavier, no seo dunha recoñecida familia da Alta Navarra. Estudou filosofía e humanidades na Universidade da Sorbona (París), continuando posteriormente estudos de teoloxía. Na cidade francesa coñeceu a San Ignacio de Loyola e xunto a outros seis compañeiros fixo, en Nosa Señora de Montmatre, voto de pobreza, castidade e de peregrinaxe a Terra Santa. En 1537 ordenouse sacerdote e, tras a aprobación da Compañía de Jesús por Paulo III, partiu como misioneiro da nova orde relixiosa cara ás Indias portuguesas, a petición do rei de Portugal. En 1542 chegou a Goa (parte occidental da India) onde predicou, bautizou e atendeu os enfermos e necesitados con verdadeiro espírito de abnegación. O seu labor incansable e de apostolado levouno a fundar máis de 40 comunidades na Costa de Pesquería e Cabo Comodín. Representante universal das misións, Francisco Xavier partiu de novo, en 1545, cara ás illas do Pacífico e Xapón, establecendo novas misións relixiosas. En 1552 comezou a preparar a viaxe para difundir a fe católica en China, pero a súa vida acabou antes de chegar ao destino, o 3 de decembro dese ano, na illa de Sancián, fronte ás costas de China. As súas cartas, desde o afastado Oriente, forneceron moita luz e coñecementos sobre aquelas descoñecidas terras. Venerado como o apóstolo das Indias e do Xapón, foi canonizado por Gregorio XV en 1622 e Pío X declarouno, en 1904, patrón da Sagrada Congregación de Propaganda FIDE. É numerosa a iconografía existente sobre San Francisco Xavier, das que caben destacar as pinturas de Murillo, Rubens, Van Dych, L. Giordano e Goya, así como a estatua tallada por Martínez Montañés que se encontra na capela da Universidade de Sevilla. No selo aparece, en primeiro termo, unha imaxe do santo tomada do óleo de Elías Salaverría que se conserva no Palacio de Navarra, en Pamplona. Como fondo figura unha escena dun kakemono japonés do século XIX que representa a chegada de San Francisco Xavier a Kagoshima, conservado no Castelo de Xavier, Navarra. Este selo, gravado por Alfredo Adán de Oro, da FNMT-RCM, foi galardoado co Premio ao "Mellor selo de técnica combinada 2006-2007" (calcografía e offset) outorgado pola Government Postage Stamp Printers' Association (GPSPA).