DIARIOS CENTENARIOS

Correos pon en circulación cinco novos selos, dentro da emisión denominada Diarios Centenarios, dedicados ao Diario de León, Diario de Pontevedra, Levante-El Mercantil Valenciano, Diario de Ávila e El Norte de Castilla, periódicos que superaron máis de cen anos de existencia. Os selos están ilustrados coas cabeceiras de cada xornal e con motivos alusivos ao centenario, ademais de logotipos e panorámicas de monumentos relativos á cidade na que aparecen. Esta emisión vén ampliar en número a xa abundante serie temática de Diarios Centenarios que conta con 17 valores xurdidos en anos anteriores. Selos cos que Correos mostra o seu recoñecemento á constancia e ao labor informativo destes diarios. O pasado día 3 de febreiro cumpriu o Diario de León o seu primeiro século de existencia xa que foi fundado en 1906 co patrocinio do bispo Sanz Sarabia. A publicación experimentou unha importante modernización na década dos 70. Pertence este xornal desde 1997 á Corporación Voz de Galicia, o que se traduciu nunha maior aposta polo comarcal, interese que plasma nas páxinas dos suplementos semanais. O xornal dixital creouse en 2002.

O Diario de Pontevedra chega ao lector desde o 13 de xullo de 1889, con algunhas interrupcións temporais de tirada. Tras os diversos momentos de crise, o periódico foi reflotado en abril de 1968 por unha sociedade cooperativa creada polos seus propios traballadores. A finais dos 90 foi adquirida a súa cabeceira polo Grupo El Progreso de Lugo que ampliou e mellorou a súa edición.

O periódico El Mercantil Valenciano, outra publicación de orixe decimonónica, xurdiu o 24 de outubro de 1872. Tras ser incautado en 1939, apareceu nos seus talleres o diario Levante que lle deu continuidade. O periódico Levante-El Mercantil Valenciano recuperou a súa anterior cabeceira e pertence ao Grupo Editorial Prensa Ibérica que se ocupou tanto da súa modernización tecnolóxica como do cadro de persoal.

O Diario de Ávila apareceu o 24 de novembro de 1898. A comezos de 1925 xestionouno a Editorial Católica Abulense. En maio de 2002, tras producirse un importante cambio no conxunto de accionistas, foi adquirido polo Grupo PROMECAL que levou a cabo diversas renovacións no xornal.

El Norte de Castilla, outro diario de fundación decimonónica foi creado o 17 de outubro de 1856 en Valladolid. Periódico por excelencia de Castela e León, de vocación informativa rexional, conta con cinco edicións diarias na súa autonomía.