Data de emisión: 09 novembro 2006
Son 125 anos os que cumpriu o xornal La Vanguardia. Por este motivo Correos dedícalle agora un selo como homenaxe e recoñecemento a un longo labor informativo, destinado sempre ao servizo da sociedade catalá e española.
Xurdiu o diario La Vanguardia en 1881, fundado por Carlos e Bartolomé Godó. Aínda que fixo a súa aparición inicial como órgano do Partit Constitucional (liberal), foi en 1888, coincidindo coa Exposición Universal, cando iniciou a súa singradura como xornal independente. De feito, o seu director, Modesto Sánchez Ortiz, no editorial de presentación reivindicou as súas afinidades coa prensa máis avanzada do seu tempo, convertendo La Vanguardia nun rotativo independente, profesional, comercial, informativo e de servizos. Durante esta etapa colaboraron co periódico varios intelectuais e artistas como Narcís Oller, Víctor Catalá, Isidre Nonell e Santiago Rusiñol. Agora ben, sería Ramón Godó, o primeiro conde de Godó quen puxera os alicerces empresariais de La Vanguardia. O seu momento de auxe coincidiu coa Primeira Guerra Mundial. Xa o xornal foi pioneiro utilizando correspondentes nas frontes de ambos os bandos belixerantes. Isto fíxolle lograr prestixio e notoriedade, alcanzando entón a cifra de 80.000 exemplares. En anos sucesivos, a introdución de fotografías e o establecemento de corresponsalías levouno a gañarse o prestixio e a credibilidade dos lectores cataláns e españois. De feito, nos anos 30, con Gaziel como director, alcanzou La Vanguardia os 200.000 exemplares de tirada. A partir dos anos 70, o xornal creceu en credibilidade, en vendas e en lectores. En 1989, Javier Godó conseguiu acrecentar o seu liderado grazas á importante renovación que afrontou, modernizando a súa imaxe, instalando novas rotativas de impresión e introducindo un novo deseño e páxinas en cor, ademais de cambiar parte do cadro de persoal. Na actualidade La Vanguardia é parte esencial do grupo multimedia Godó, conformado por prensa, radio, televisión e Internet. O diario pon á venda máis de 200.000 exemplares. O selo que sobre el se emite reproduce unha tira a modo de cabeceira co ano de fundación e o actual e, como fondo, exemplares amontoados.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.