Data de emisión: 10 outubro 2006
Entre os grupos actuais de música pop, El Canto del Loco ocupa un dos lugares máis destacados da discografía española. Por este motivo, entre as emisións programadas durante A Exposición Mundial de Filatelia non podía faltar a dedicatoria dunha das súas follas bloque a este carismático grupo; sen dúbida un dos de maior éxito e máis admirado polas novas xeracións.
Son Dani (vocalista), David (guitarrista), Chema (baixista) e Jandro (batería), músicos, compositores e sobre todo un grupo de amigos que comparten unha mesma filosofía musical. “Non somos un grupo de virtuosos. Somos músicos de riff, non de técnica”, comentan os integrantes da banda. Formáronse en Madrid e gravaron o primeiro disco, no ano 2000, baixo o seu propio nome: El Canto del Loco, do que venderon 80.000 copias. O ritmo da súa música e as letras próximas e abertas das súas cancións pronto atraeron a un público maioritariamente xuvenil. En 2002 sacaron ao mercado un novo álbum musical gravado en directo: A Contracorriente. As xiras por España e Latinoamérica, nun continuo sen parar, leváronos a obter dous premios MTV Europa (como Mellor Grupo Español) e dous Premios Ondas (Mellor Grupo en Directo e Mellor Grupo Español) durante dous anos consecutivos. En 2003 publicaron Estados de Ánimo, composto por 12 cancións que marcaron o recoñecemento internacional do grupo. En 2005 chegou a súa última e máis famosa gravación discográfica: Zapatillas, a de maior éxito en vendas. Segundo as súas propias declaracións, nas súas letras tratan de expresarse como son, reflectir o ambiente social e contar o que pasa no mundo. “Son os sentimentos os que chegan á xente e cremos na importancia das persoas e da rúa”, manifestan. Quizais, desa sinceridade e desa proximidade cara a todo o que os rodea, mesturado cuns bos acordes musicais, veñan os seus triunfos e a súa aclamación polo gran público. Os catro compoñentes de El Canto del Loco ilustran a folla bloque da presente emisión, deseñada polo Estudio Jesús Sánchez. No selo aparecen unhas notas musicais sobre un pentagrama, o nome do grupo musical e o emblema da exposición.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.