Data de emisión: 06 xullo 2006
As Carreiras de Cabalos de Sanlúcar de Barrameda, consideradas como “o maior espectáculo das praias do Sur”, son as protagonistas da nova emisión filatélica enmarcada na coñecida serie Festas Populares.
As Carreiras de Cabalos de Sanlúcar de Barrameda (Cádiz) teñen lugar todos os anos no mes de agosto entre as praias de Baixo de Guía e das Piletas, xunto á desembocadura do río Guadalquivir, co Parque Nacional de Doñana como pano de fondo. Para fixar a celebración das carreiras consúltanse as táboas de mareas e fíxanse dous ciclos de tres días cada un, sempre coincidindo coa baixamar, de tal forma que entre o primeiro e segundo ciclo transcorren 14 días. Durante os seis días de competición celébranse 26 carreiras suxeitas ás normas oficialmente establecidas. O colorido e a animación da festa, unido á paraxe natural do lugar de celebración, atraen a centos de visitantes que se reúnen arredor dun improvisado hipódromo praieiro onde, entre carreira e carreira, poden realizarse apostas nos lugares oficiais e nos tradicionais e coñecidos postos de apostas infantís montados en casetas de cartón ao longo de todo o percorrido. A orixe das carreiras é de carácter mariñeiro e popular. Contan que a principios do século XIX o peixe se descargaba na praia de Baixo de Guía e o de mellor calidade era transportado ata os mercados e poboacións próximas a Sanlúcar nos lombos dos cabalos máis resistentes, coñecidos como “cabalos corredores”. A modo de diversión, e mentres esperaban a chegada das barcas pesqueiras, os cabalos eran sometidos a competicións de velocidade sobre as húmidas e finas areas da praia sanluqueña. As primeiras carreiras celebráronse o 31 de agosto de 1845 e o 20 de setembro do mesmo ano constituíuse a Sociedade de Carreiras de Cabalos de Sanlúcar de Barrameda, a máis veterana do país. En 1989 foron declaradas Festas de Interese Turístico Nacional, pola Secretaría Xeral de Turismo, e en 1997 foron propostas para obter a declaración de Festas de Interese Turístico Internacional, pola Dirección Xeral de Turismo.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.