NAVIDAD 2006

A emisión sobre o Nadal proporciona dous novos selos autoadhesivos ao coleccionismo filatélico. Como en anteriores emisións dedícase un a un tema clásico que reproduce a Adoración dos Pastores, da catedral de Cuenca, mentres que o outro, de motivo moderno, mostra unha pintura titulada Entrañable Navidad, da artista contemporánea, Belén Elorrieta.

A catedral de Cuenca foi construída en 1183 por iniciativa da raíña Leonor de Aquitania e Plantagenet, esposa de Alfonso VIII, e é o exemplo máis temperán do gótico no noso país. É única no seu estilo xa que a súa construción é de influencia normanda. É un edificio que se foi facendo co paso dos séculos, posto que se comezou no románico e na actualidade presenta incluso elementos abstractos no seu conxunto. A súa planta é de cruz latina e da catedral salientan tres partes fundamentais: a cabeceira, na que atopamos reminiscencias románicas, realizada entre 1183 e 1207, que abrangue a capela maior coa nave do cruceiro incluída; o corpo que presenta un gótico máis depurado, acabado arredor de mediados do século XII; e o deambulatorio, de gran beleza e suntuosidade, realizado na segunda metade do século XV, veu ampliar o espazo interior catedralicio. Da catedral de Cuenca temos que salientar tamén a súa sancristía maior e a sala capitular. Esta última construída no século XVI e en cuxa portada hai catro nichos inferiores onde se representan as Virtudes Cardinais e nos superiores as Virtudes Teologais. Culminando a portada, aparece o tímpano decorado cun grupo escultórico da Adoración dos pastores, conxunto que dá imaxe ao selo.

O outro selo, ilustrado cun tema do Nadal contemporáneo no que aparecen obxectos decorativos alusivos a esta festividade, reproduce Entrañable Navidad, cadro da pintora madrileña Belén Elorrieta Jové, autora que conta con numerosos galardóns e exposicións. É a súa pintura abondosa en cromatismos de ricos matices, de solta e espontánea pincelada e de aparente inxenuidade compositiva na que se perciben aires melancólicos. Elorrieta realizou unha vintena de exposicións individuais en diversas galerías do noso país.