PERSONAJES. 50 ANIVERSARIO DE LA MUERTE DE PÍO BAROJA

Correos conmemora o 50 aniversario do falecemento de Pío Baroja coa emisión dun selo que se ilustra cun retrato do escritor, nacido en San Sebastián o 28 de decembro de 1872 e falecido en Madrid o 30 de outubro de 1956.

Pío Baroja, durante a súa infancia, viviu coa súa familia en diversas cidades españolas. Realizou estudos de Medicina en Madrid e Valencia e doutorouse coa tese A dor. Estudo de psicofísica, que publicou en 1896. Tras exercer dous anos como médico en Cestona, regresou a Madrid onde rexentou unha panadería herdada dun familiar. Foi a raíz de entrar en contacto co mundo literario cando comezou a publicar os seus primeiros libros, Vidas sombrías e La casa de Aizgorri (ambos de 1900). Colabora por este tempo con varias publicacións e realiza diversas viaxes por Europa. Logo alternará estancias entre Madrid e o caserón de Itzea, mercado en 1912 en Vera de Bidasoa. En 1935 ingresou na Real Academia Española. Tras estoupar a guerra civil trasládase a Francia onde reside ata 1940. Logo regresará a Madrid onde exercerá a súa actividade literaria ata os seus últimos días. Aínda que Pío Baroja se internara nos diversos xéneros literarios, foi a novela o seu xénero preferente. O autor, que escribiu varias obras soltas, chegou a agrupalas na súa maioría en triloxías, aínda que en moitos casos estas novelas tiveran poucos elementos en común. Da extensa produción literaria de Baroja destacamos, ademais das mencionadas: Zalacaín el aventurero (1909); El árbol de la ciencia (1911); Las inquietudes de Shanti Andía (1911); El laberinto de las sirenas (1923); Las veleidades de la fortuna (1927); Los visionarios (1932); Locuras de carnaval (1937); Susana (1938); El caballero de Erlaiz (1944); El puente de las ánimas (1945); El cantor vagabundo (1950) e Las veladas del chalet Gris (1951), entre outros moitos títulos. A estes hai que engadir a súa extensa novela histórica Memorias de un hombre de acción, inspirada nun aventureiro antepasado do autor, ademais de numerosos contos, ensaios, algunhas obras dramáticas e un libro de poemas. Baroja, membro destacado da Xeración do 98, preocupado pola vida española do seu tempo, intentou reflectir na súa obra o panorama social da época.