Data de emisión: 12 maio 2007
O 12 de maio de 1982, as Cortes Xerais aprobaron a Lei orgánica do Tribunal de Contas, máximo órgano de fiscalización económico-financeira e xurisdición contable que depende directamente das Cortes Xerais. Aos 25 anos da promulgación da lei, recórdase a efeméride coa emisión dun selo conmemorativo.
Situado en pleno centro de Madrid, rúa Fuencarral, o Tribunal de Contas álzase nunha construción de estrutura cuadrangular catalogada polo Plan Xeral de Urbanismo como “Edificio Singular”. A súa competencia xurisdicional esténdese por todo o territorio nacional, sen prexuízo dos órganos fiscalizadores de contas que existan nas comunidades autónomas e, no artigo primeiro da lei, establécese que: “O Tribunal de Contas é o supremo órgano fiscalizador das contas e da xestión económica do Estado e do sector público ... de acordo coa Constitución e a presente lei orgánica”. A norma lexislativa desenvólvese ao longo de corenta e nove artigos, nos que se analizan detalladamente as funcións e competencias que cumpre a institución, con total independencia e sometemento ao ordenamento xurídico. Entre estas funcións figuran: “A fiscalización externa, permanente e consuntiva da actividade económico-financeira do sector público” e “O axuizamento da responsabilidade contable en que incorran os que traballan ao seu cargo no manexo de caudais ou efectos públicos”. A orixe histórica do Tribunal de Contas remóntase á casa Trastámara, durante o reinado de Xoán II (1406-1454), en que se outorgan as primeiras ordenanzas completas para os contadores maiores de contas, ano 1437. Estas normas xurdiron polas dificultades que existían na recadación de tributos e na ordenación das contas, encomendándolles aos contadores maiores “a capacidade de oír e librar preitos, reclamar as débedas dos impostos non recadados, ou recadados e non ingresados nas arcas. Deste modo, convertéronse en xuíces para impoñer multas e sancións”. 545 anos separan estas primeiras ordenanzas da lei actual. No selo reprodúcese a fachada principal do Tribunal de Contas bordeado coa inscrición: “XXV Aniversario 1982-2007 Lei orgánica Tribunal de Contas”.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.