EFEMÉRIDES.Coronación Canónica de María Stma. de la O. Sevilla

Ponse en circulación un novo selo da serie Efemérides dedicado a conmemorar a Coroación Canónica de María Santísima da O, acto relixioso que terá lugar o 16 de xuño no sevillano barrio de Triana.

A Coroación da Virxe da O constitúe todo un recoñecemento á devoción e veneración do pobo cara á imaxe mariana. É o acto máis distinguido que realiza a Igrexa Católica en acción á celebridade de que goza a sagrada Virxe entre miles de fieis, asociacións, movementos apostólicos, irmandades e confrarías da cidade de Sevilla, ademais de asociacións civís e culturais. A talla actual de María Santísima da O foi realizada polo reputado imaxineiro Antonio Castillo Lastrucci, en 1937, para substituír á escultura primitiva destruída durante a Guerra Civil. Representa unha Dolorosa coa cabeza lixeiramente inclinada e unha mirada expresiva de ollos negros dos que se desprenden cinco lágrimas de cristal. A boca é fina e pequena, de labios entreabertos que deixan ver a arcada dental superior. A imaxe é de candeeiro para vestir, tamaño natural, aproximadamente de 1,62 m de alto, e brazos articulados. Os dedos das mans aparecen estendidos e lixeiramente flexionados os da man dereita para suxeitar o pano. A Virxe da O encóntrase na Parroquia da Nosa Señora da O, en Triana, e o seu autor, Castillo Lastrucci (Sevilla 1882- 1967), é un dos máis afamados escultores de imaxinería andaluza. Estudou na Escola Provincial de Belas Artes de Sevilla e moi pronto destacou coa súa obra, recibindo varios premios da Deputación Provincial. Nun principio tallou temas relacionados co mundo do touro, unha das súas grandes afeccións, para pasar de cheo ás figuras relixiosas e ás composicións escultóricas de conxunto: os pasos procesionais. Debido ao éxito alcanzado e aos numerosos encargos feitos polas Irmandades, en 1923 creou o seu propio obradoiro do que saíron discípulos que gozan de gran fama na actualidade. Da súa man saíron máis de 450 obras que se encontran repartidas por toda a península. No selo reprodúcese o rostro aflixido de María Santísima da O, unha das imaxes máis queridas e veneradas polos sevillanos.