EUROPA 2007. CENTENARIO DEL MOVIMIENTO SCOUT

Un ano máis, os países membros de PostEurop (Asociación de Operadores Postais Públicos Europeos) poñen en circulación a serie Europa, cun tema en común, dedicada nesta ocasión ao Movemento Scout ao cumprirse o centenario da súa creación.

Foi o militar británico Robert Stephenson Smith Baden-Powel (Londres 1857 - Nyeri, Kenya, 1941) quen fundou o Movemento Scout no ano 1907. Cunha destacada carreira militar, na que se revelou como un excelente explorador, “Scout” en inglés, loitou na guerra contra os Boers en Sudáfrica, defendendo valorosamente a cidade asediada de Mafeking (1899-1900). Para isto serviuse dun grupo de rapaces uniformados aos que instruíu en determinadas tarefas, como levar mensaxes e ordes aos soldados, facer de sentinelas e axudar na distribución de medicinas e alimentos, responsabilizándoos das súas funcións. Esta idea sobre a responsabilidade xuvenil levaríao a fundar o Movemento Scout. Autor de varios libros sobre métodos educativos, en 1907 Baden-Powel reuniu na illa de Brownsea, ao sur de Inglaterra, un grupo de 20 rapaces de distintas idades e estamentos sociais para ensinarlles técnicas de supervivencia ao aire libre, construír refuxios, preparar os seus propios alimentos, percorrer a natureza, observar os animais, instruílos sobre primeiros auxilios... Tratábase do primeiro campamento experimental que daría paso inmediatamente ao coñecido Movemento Scout que pretende, en definitiva, o desenvolvemento físico e mental de nenos e rapaces de ambos os dous sexos, para que poidan desempeñar un papel construtivo na sociedade. Na actualidade, o escultismo é un movemento educativo que conta con máis de 28 millóns de persoas repartidas por todo o mundo -entre rapaces e adultos, homes e mulleres- que ademais da idea orixinaria de vida ao aire libre e traballo en equipo, colaboran en tarefas de axuda humanitaria, analfabetismo, formación profesional, prevención e loita contra a SIDA e a drogodependencia, protección de menores e un longo etcétera, en cooperación con institucións como UNICEF, UNESCO e Nacións Unidas. No selo reprodúcese o logotipo do centenario coa flor de lis, emblema mundial do Movemento Scout e o lema “Un mundo, unha promesa”.