FUERZAS ARMADAS EN MISIONES DE PAZ

Como homenaxe ás accións humanitarias e de paz levadas a cabo polos exércitos españois nas distintas partes do mundo, ponse en circulación un selo de Correos dedicado ás Forzas Armadas en Misións de Paz.

As forzas armadas españolas iniciaron oficialmente a súa participación en operacións de paz no ano 1989, aínda que moitos anos antes xa colaboraran en operacións similares ás actualmente denominadas “operacións de paz”. Así, na década dos anos vinte, as tropas españolas formaron parte do continxente internacional da cidade chinesa de Shanghai e a Garda Civil participou coa policía francesa na cidade libre de Tánxer (Marrocos). Tamén, durante a guerra de Vietnam, un grupo de voluntarios do Corpo de Sanidade do Exército de Terra prestou axuda sanitaria no hospital do sur de Saigón e, anos máis tarde, volveu cooperar en Guinea Ecuatorial. En 1989, e ao abeiro da nova Resolución do Consello de Seguridade das Nacións Unidas, as forzas armadas españolas comezaron a súa andaina nas chamadas operacións de paz, intervindo en Angola e Namibia. As Nacións Unidas establece unha distinción entre observadores militares, para previr e salvagardar a paz, e forzas de mantemento da paz, que actúan como elemento disuasorio e mediador entre as partes. En 1992, o secretario xeral da ONU estableceu as seguintes misións: Diplomacia preventiva, para evitar que xurdan controversias entre as partes e que non evolucionen cara a un conflito militar; Establecemento da paz, para que as partes en conflito se acollan ao capítulo IV da Carta das Nacións Unidas; Mantemento da paz, esixe a presenza militar ou civil da ONU co consentimento das partes en conflito, para vixiar a aplicación dos acordos e garantir a axuda humanitaria; Imposición da paz, utilízase cando fracasan todas as medidas anteriores e ao abeiro do capítulo VII da Carta; Consolidación da paz, coincide coa fin do conflito e o seu obxectivo é fortalecer a paz; finalmente, Axuda humanitaria, compatible cos puntos anteriores. Desde 1989, España participou en 52 operacións de paz e de axuda humanitaria en Europa, Asia, Hispanoamérica, Oriente Medio e África, con cerca de 72.000 militares dos tres exércitos. Na actualidade, as forzas armadas operan con unidades en Bosnia-Herzegovina, Kosovo, Afganistán e Líbano e manteñen observadores en exIugoslavia, Darfur, Kosovo, Eritrea e R D Congo.