50 ANIVERSARIO DEL PARLAMENTO EUROPEO

A Unión Europea (UE) volve ser protagonista da emisión dun selo que conmemora, nesta ocasión, o 50 Aniversario do Parlamento Europeo.

En 1958, un ano despois da sinatura do Tratado de Roma que deu lugar ao nacemento da UE, establecíase o Parlamento Europeo baixo a presidencia do gran europeísta Robert Schuman. Nestes 50 anos a institución parlamentaria foi ampliando a súa estrutura e competencias, constituíndose na única asemblea parlamentaria plurinacional elixida por sufraxio directo no mundo. Na actualidade conta con 785 deputados (europarlamentarios) elixidos libremente polos cidadáns dos 27 países que forman a Unión. As eleccións teñen lugar cada cinco anos. O Parlamento Europeo ou Eurocámara organiza as súas actividades mediante grupos políticos afíns, con independencia da súa nacionalidade, que representan todas as ideoloxías: centro dereita, socialistas, liberais, nacionalistas, comunistas, verdes e euroescépticos. Co Consello da Unión Europea comparte a responsabilidade de aprobar as leis europeas e o orzamento anual da UE. Así mesmo, exerce un control democrático sobre as outras institucións da Unión e dá a súa aprobación aos acordos internacionais para a adhesión de novos Estados e para o establecemento de relacións comerciais entre a UE e outros países. O Parlamento realiza as súas sesións plenarias en Estrasburgo (Francia), mentres que as reunións preparatorias e complementarias teñen lugar en Bruxelas (Bélxica). Traballa nos 23 idiomas oficiais da Unión e as súas comisións parlamentarias se ocupan de temas de interese común para os cidadáns europeos, como a protección do medio ambiente, os dereitos dos consumidores, os transportes e a libre circulación de traballadores, capitais, bens e servizos, sempre baixo o respecto á diversidade cultural, a democracia, a liberdade e a xustiza social. O lema da UE: Unidade na diversidade resume a súa filosofía. No selo reprodúcese o logotipo do cincuentenario do Parlamento e a emblemática bandeira da UE, coas doce estrelas douradas sobre fondo azul.