CIENCIAS DE LA TIERRA Y DEL UNIVERSO

O Ano Polar Internacional e o Ano Internacional do Planeta Terra son os temas que ilustran a serie Ciencias da Terra e do Universo.

O ano 2008 foi declarado pola Asemblea Xeral das Nacións Unidas como Ano Internacional do Planeta Terra. A proposta foi presentada conxuntamente pola Unión Internacional de Ciencias Xeolóxicas (IUXS) e a UNESCO para concienciar a sociedade da importancia que teñen as Ciencias da Terra na vida cotiá cando se aplican os coñecementos dos xeocientíficos de todo o mundo. Desta forma poderíanse evitar moitas das traxedias humanas causadas por fenómenos naturais, como terremotos e tsunamis. Entre os obxectivos presentados figuran reducir os riscos producidos polos desastres naturais; descubrir novos recursos naturais e facelos accesibles de maneira sostible; contribuír ao ordenamento territorial nas novas áreas urbanas; fomentar entre os rapaces o estudo das Ciencias da Terra e aumentar os presupostos para investigación. No selo reprodúcese unha pedra de canto rodado, aparentemente estéril, da que xorde un brote vexetal como expresión de esperanza de vida.

Así mesmo o período 2007-2008, declarado Ano Polar Internacional, centra o seu interese en potenciar as observacións nas zonas polares do planeta (Ártico e Antártida) a través dun programa internacional de investigación científica coordinada. A idea foi promovida polo Consello Internacional para a Ciencia (ICSU) e a Organización Meteorolóxica Mundial (OMM) e conta co apoio de 60 países, universidades e investigadores de todo o mundo agrupados en máis de 200 proxectos. Entre as súas finalidades están, entre outras, o estudo da situación ambiental nas rexións polares; a mellora da predición sobre os cambios futuros; a interacción entre as zonas polares e o resto do planeta, e a ampliación da ciencia ás rexións polares. No selo aparece un globo terráqueo con dúas bocas -Polos Norte e Sur- por onde se insufla aire. Os polos concíbense como de mantemento do planeta Terra.