EXPO ZARAGOZA 2008

Esta folla bloque emítese con motivo da celebración da Exposición Internacional Expo Zaragoza 2008, acontecemento mundial que se celebra do 14 de xuño ao 14 de setembro e que xira arredor do tema central da Auga e Desenvolvemento Sostible. No seu deseño, na parte inferior esquerda, xunto ao logotipo de Expo Zaragoza 2008, figura como enunciado A maior festa da auga na Terra.

Ilústrase esta folla bloque e os tres selos cunha vista aérea da maqueta do recinto da Expo. Aparecen na imaxe, en primeiro termo o Pavillón-Ponte, con formas orgánicas, estilizadas e trenzadas. É unha das entradas principais da Exposición Internacional. Á esquerda da ponte e en primeiro plano está situada unha das seis prazas temáticas independentes que ofrece como tema monográfico expositivo Inspiracións acuáticas. É un edificio que ten forma de cuncha e conta cun deseño bioclimático e foi creado para albergar o espectáculo “O home vertente”. Séguenlle, distribuídas ao longo das marxes fluviais do Ebro, as outras cinco prazas temáticas denominadas: Auga extrema, cuxo aspecto exterior simboliza o instante no que unha onda rompe sobre a praia. Trata de emocionar e concienciar ao visitante sobre os riscos da auga; a praza Sede simula no seu aspecto exterior os efectos dun espellismo e nela, a través dos seus contidos, invítase ao visitante a reflexionar sobre o concepto sede que dá denominación ao espazo; con Oikos, auga e enerxía preténdese demostrar ao visitante que é posible transformar e almacenar a enerxía utilizando a tecnoloxía, sendo respectuosos co ambiente; en Cidades de auga, praza temática exenta de muros, contémplase esta como recurso urbano, subliñando o gran valor deste elemento natural no proceso de mellora da calidade de vida das cidades. Contempla aquí a auga como espectáculo, como recurso e como futuro; e, por último, Auga compartida é unha praza que consta de varias plataformas con diferentes niveis nos que se informa sobre a política da auga, sobre a problemática asociada a este elemento, sobre a xestión da conca hidrográfica, etc. No fondo da folla localízanse numerosos pavillóns e infraestruturas da Expo.