Data de emisión: 10 xaneiro 2008
O talonario autoadhesivo de Flora ocúpase de reproducir a imaxe da camelia, mentres que o de Fauna está dedicado ao peto verdeal.
É a camelia unha planta ou arbusto da familia Theaceae e pertence ao xénero Camellia, nome dado por Linneo en honor a G. J. Kamel, farmacéutico xesuíta que colectou estas plantas en Filipinas. Tamén coñecida como Camelia xapónica, é nativa de Asia Oriental, aínda que a maior parte das especies coñecidas proceden de China. Logra unha considerable altura, entre 5 e 10 m, e as súas follas son pecioladas, ovaladas, grosas e co borde dentado, ademais de consistentes, de cor verde escura e moi brillantes. En canto ás súas flores son terminais, poden presentarse en solitario ou en parellas. O seu tamaño é variable, entre 3 e 10 cm de diámetro. Posúe unha fileira de pétalos que forman a corola e as súas cores varían, pois van desde o branco ao vermello, pasando polo rosa.
O selo de Fauna utiliza como imaxe o peto verdeal ou Picus viridis, unha ave da familia Picidae, con plumaxe de cores vistosas. A súa cabeza está marcada por píleo de cor vermella e, dependendo de se é macho ou femia, a bigoteira pode ser vermella ou negra. O seu pico é longo e forte, o que lle permite perforar os troncos das árbores e extraer as lascas para no burato instalar o seu niño. Posúe unha longa lingua, de ata 15 cm, coa que captura larvas e insectos. O voo desta ave, duns 30 cm de lonxitude e uns 200 gr de peso, é ondulante e o seu hábitat preferido é o bosque mixto e as terras de labranza con pastos e árbores. Reprodúcese entre os meses de maio a xullo e na súa única niñada anual incuba arredor de cinco ovos. O seu reclamo soa a un tamborileo, ao golpear o pico contra o tronco das árbores.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.