JUEGOS Y DEPORTES TRADICIONALES

Practicado en case todo o territorio nacional, o xogo de bolos enmárcase no grupo de xogos e deportes tradicionais de lanzamento de precisión. Xa exercitado no Antigo Exipto, o xogo de bolos gozou dunha gran popularidade durante a Idade Media e o Renacemento en toda Europa, pasando a unha situación de decadencia a mediados do século XX. Non obstante, na cornixa Cantábrica, Castela e León o xogo constituíu sempre un costume de longa tradición. Das modalidades de xogo que existen, a filatelia deixa constancia nesta folla bloque -formada por tres selos e tres viñetas sen valor postal- das tres máis coñecidas.

O Bolo Palma, orixinario de Cantabria e Asturias, estendeuse a partir do século XVIII polas dúas Castelas. O terreo de xogo consta dunha boleira, duns 30 a 34 m de longo, dividida en tres partes: caixa, lugar onde se colocan os bolos; campo de tiro e campo de birle. As bólas son esféricas, de tipo palma, podendo estar achatadas polos polos, cun peso que oscila entre 1,8 e 2,2 Kg. Os bolos teñen forma troncocónica dobre con cabeza esférica e nesta modalidade utilízanse nove bolos e un máis pequeno chamado emboque. O xogo consta de dúas fases: tirar e birlar. Na primeira lánzanse as bólas para que cheguen á caixa ou ao punto máis próximo co fin de derribar os bolos ou facer emboque. Na fase de birlar vólvese lanzar a mesma bóla desde o punto no que se detivo para chegar á caixa e derribar os bolos. O Bolo Leonés é o máis representativo de Castela e León. A boleira mide de 25 a 30 m de lonxitude e está dividida en dúas partes: castro, onde se colocan os bolos, e campo de xogo. Os bolos teñen forma troncocónica simple e utilízanse nove grandes e un máis pequeno chamado miche. Esta modalidade de xogo ten a particularidade de usar unha bóla semiesférica cos cantos redondeados, fabricada en madeira de gran dureza e un peso que oscila entre 0,80 e 1 Kg. O desenvolvemento do xogo é moi similar ao anterior, coas fases de tirar e birlar. O Bolo Asturiano ou de cuatreada practícase na zona xeográfica do seu nome. Nesta variedade deportiva a boleira ten unha medida de 25 m de longo e encóntrase dividida en tres partes: zona de tiro, zona intermedia e castro, lugar con forma de circunferencia truncada na parte frontal onde se colocan os bolos. Estes teñen forma cónica con cabeza esférica e necesítanse nove grandes e un pequeno chamado biche. As bólas son esféricas, cun burato para introducir o dedo e pesan entre 0,60 e 0,80 Kg. A diferenza dos anteriores, o desenvolvemento do xogo é dunha soa fase.