Juegos y deportes tradicionales: Pelota valenciana. Pelota vasca

Baixo este epígrafe, ponse en circulación unha nova serie filatélica dedicada a recordar xogos e deportes tradicionais de distintas rexións españolas que forman parte do noso acervo cultural. Algúns destes xogos chegaron ata os nosos días debido ao esforzo de pequenos grupos sociais que souberon preservar as súas tradicións para facérllelas chegar ás xeracións vindeiras. Con esta emisión rememóranse os xogos de pelota valenciana e pelota vasca, por ser a bóla ou a pelota o xogo máis común entre as antigas civilizacións orientais, maias e grecorromanas. O xogo da pelota valenciana, similar ao practicado noutros países e rexións españolas, remóntase á época medieval como forma de diversión para a nobreza e a xente do pobo. Practicado na rúa ou en trinquetes (espazos cerrados) alcanzou o seu apoxeo no Renacemento. Posteriormente foi decaendo ata chegar a mediados do século XIX, que quedou arraigado como un xogo autóctono da rexión valenciana.

A pelota valenciana xógase na rúa ou en trinquete, onde dous equipos dun ou varios xogadores ocupan campos opostos lanzándose a pelota coa man para conseguir que a falta se produza no campo contrario. Na modalidade de rúa pódese xogar en raspall, galotxa e llargues. En trinquete as variedades son raspall, escala i corda e rebot.

A pelota vasca practícase principalmente no País Vasco, Navarra e A Rioxa. A variedade de pelota a man estendeuse por todo o territorio nacional. O xogo desenvólvese nunha cancha chamada frontón no que os pelotaris, un ou dous de cada equipo, se sitúan nos puntos regulamentados para iniciar o saque que se bota a sortes. O encargado de sacar sitúase a varios metros por detrás da liña de saque e tras correr cara a diante bota a pelota no chan e golpéaa coa palma da man cara á parede do frontón. O xogador do equipo contrario debe continuar golpeando a pelota contra a parede e así sucesivamente ata que un dos contendentes falle. Se o saque queda curto anótase un punto o equipo contrario. Segundo as modalidades, os partidos xóganse a unha determinada puntuación estipulada no regulamento. Cada selo vai unido a unha viñeta sen valor postal que forma un conxunto que reproduce distintos momentos do xogo de cada unha das modalidades.