Data de emisión: 16 xullo 2008
A serie titulada Xogos e Deportes Tradicionais, posta en circulación ao longo de 2008 para recordar o amplo patrimonio recreativo que se conserva en gran parte das comunidades españolas, amplíase cun selo dedicado ás Regatas de Traiñeiras. Esta modalidade enmárcase no grupo de xogos e deportes náuticos e acuáticos que, fundamentalmente, gozan de gran arraigamento popular en toda a cornixa Cantábrica: País Vasco, Cantabria, Asturias e Galicia.
As regatas de traiñeiras teñen a súa orixe na pesca de baixura e nos remeiros, que tras recoller a pesca nos caladoiros volvían a porto coa maior rapidez. Co paso dos anos e ao ser substituídas as embarcacións de remo polas de motor, as vellas tradicións pesqueiras deron paso a probas competitivas nas vilas mariñeiras xurdindo, así, un dos espectáculos deportivos de maior aceptación. As regatas da Concha (San Sebastián) organizáronse por primeira vez en 1879 e, salvo episodios esporádicos, celebráronse sen interrupción. A este nome únense o doutras moitas localidades do norte, que durante os meses de verán se disputan o primeiro posto nos distintos concursos organizados. As regatas de traiñeiras celébranse no mar aberto, ría ou encoro, con rúas balizadas para cada embarcación. A distancia do percorrido é de tres millas (5.556 metros), disputadas nun máximo de catro longos e tres ceavogas (manobra técnica consistente en realizar un xiro de 180º para continuar o percorrido en sentido contrario). A tripulación está composta por un patrón e 13 remeiros, que se sitúan na embarcación dependendo da experiencia, forza e habilidade. Os campionatos de España de traiñeiras comezaron a celebrarse en 1944 e entre os galardóns máis destacados figuran o Gran Premio do Nervión, Gran Premio de Santander e Gran Premio da Coruña, sendo as traiñeiras de Pedreña, Orio e Kaiku as máis galardoadas ao longo dos anos. O selo vai unido a unha viñeta sen valor postal, formando unha imaxe conxunta que recrea a escena dunha traiñeira baixo as ordes do patrón.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.