MODA ESPAÑOLA

A Moda Española ocupa actualmente un lugar destacado nas pasarelas internacionais. París, Londres, Milán e Nova York réndense aos pés dos nosos grandes deseñadores e a filatelia súmase á moda coa emisión dunha folla bloque, de catro selos, que reproduce traxes de alta costura do gran mestre Pedro Rodríguez.

Considerado como un escultor da moda e un dos máis afamados modistos do século XX, Pedro Rodríguez (Valencia 1895-Barcelona 1990) dedicou a súa longa vida á arte do vestir. Sendo neno aprendeu as primeiras puntadas na mellor xastrería de Barcelona para pasar, uns anos máis tarde, ao taller do modisto Rabaseda, onde se instruíu na costura feminina. En 1919 funda o seu propio taller en compañía da súa esposa Ana María, modista profesional, iniciándose no mundo da alta costura. En 1924 inaugura a súa sede definitiva no Paseo de Gracia barcelonés, pero será en 1929 -coa presentación das súas coleccións no Palacio Nacional de Montjuich, coincidindo coa Feira Internacional de Mostras- cando alcanza o verdadeiro éxito, converténdose no modisto español máis importante da época. En 1937 abre salón en San Sebastián e dous anos máis tarde en Madrid. As súas coleccións preséntanse nos mellores desfiles de Europa e América logrando renome internacional e aos seus locais acoden a alta burguesía, a aristocracia e afamadas actrices do cine americano desexosas de lucir algúns dos seus elegantes vestidos. A chegada da confección industrial de calidade, a finais dos anos 60, foi desprazando paulatinamente a alta costura e fixo que en 1978 Pedro Rodríguez, ao igual que outros modistos, pechará os seus talleres. Na folla bloque reprodúcense, de esquerda a dereita e de arriba a abaixo, un traxe de festa (1968-1970) con corpo, cinto e sobresaia en gasa de seda pintada a man en cores degradadas, laranxas, rosas e vermellos. O corpo é axustado con tirantes de cordón. Continúa un traxe con escote palabra de honor (sobre 1947) e saia de amplo voo de satén bordado con acibeches e abelorios que reproducen motivos florais, péchase o baixo cun volante en tule de seda. Dos anos 60 tomouse un vestido de gasa estampado en lunares e flores, con escote en pico dianteiro e lazo zapateiro na caluga. Por último, conxunto de vestido e abrigo en crespón rosa. O abrigo leva banda bordada con motivos xeométricos en escote colo e puños. As imaxes foron cedidas polo Museo do Taxe, Madrid.