CASTILLOS 2009

Emítense dous selos da serie Castelos, que se ocupan de difundir as imaxes do de Arévalo en Ávila e o de Javier en Navarra. De ambos os dous aparecen as súas fachadas principais reproducidas en calcografía nos selos.

O castelo de Arévalo está situado nunha zona próxima á confluencia dos ríos Arevalillo e Adaja, que serviron como defensa e foso natural. Esta construción en pedra e ladrillo foi mandada edificar a mediados do século XV por don Álvaro de Zúñiga y Guzmán, quen recibiu de Enrique IV o título do Ducado de Arévalo. Tras a morte de don Álvaro de Zúñiga, o castelo pasou a ser propiedade dos Reis Católicos. Esta fortaleza foi convertida en prisión ata o século XVII. Logo, coas guerras de Sucesión e da Independencia, o conxunto quedou sumido na ruína e pasou a converterse en cemiterio ata o pasado século XX. O castelo, de planta pentagonal, despois da súa restauración, mostra unha gran torre da Homenaxe e cubos circulares que sobresaen ou destacan da súa muralla. Pertence a fortaleza, na actualidade, ao Ministerio de Agricultura que o destinou a dependencias do Servizo Nacional do Trigo e do Museo do Cereal.

O castelo de Javier, próximo á localidade do mesmo nome, foi construído no século X e pertencía aos Señores de Javier. Nel naceu e viviu o seu fillo, San Francisco Javier. Tanto o castelo como a vila foron gañados arredor de 1223 polo rei Sancho VII de Navarra a un nobre aragonés. En 1236 foi entregado por Teobaldo I a Adán de Sada e en 1516 demoleuse parcialmente por orde do cardeal Cisneros. Consta o castelo de tres corpos graduados construídos por orde de antigüidade. Accédese a el por unha ponte levadiza que leva a un patio defendido pola torre do Cristo. Conta ademais esta fortaleza cunha torre da Homenaxe chamada tamén de San Miguel. A propiedade, tras pertencer a diversas familias, recaeu na Casa de Villahermosa, quen construíu unha basílica acaroada aos muros do castelo e restaurouno en 1901 para doarllo despois á Compañía de Jesús. O castelo de Javier é na actualidade a Casa-Museo de San Francisco Javier.