PATRIMONIO NACIONAL. Tapices

A emisión de Patrimonio Nacional, dedicada a tapices, consta dunha folla bloque con dous selos recreados en cadanseu xogo, un da pelota a pala e outro de xogo de bolos. O primeiro reproduce un cartón para tapiz de Goya sobre o devandito xogo, mentres que o segundo, se ilustra cun cadro do pintor Antonio González Velázquez. Ambos os tapices forman parte das coleccións de Patrimonio Nacional.

O cartón de tapiz que recrea El juego de la pelota a pala, integrado na temática de cadros de costumes, foi realizado por Francisco de Goya en 1779. É unha composición de estilo rococó, elaborada en óleo e pertence á terceira serie que Goya realizou para o dormitorio dos príncipes de Asturias no Palacio do Pardo. É o cartón máis grande de toda a serie, cuxo tapiz foi executado en seda e la polos tapiceiros Vandergoten na Real Fábrica de Tapices de Madrid. Nesta composición, Goya consegue un perfecto equilibrio entre os personaxes e o espazo, obtendo volumes adecuados tanto no representado como no tema desenvolvido. O artista de Fuendetodos demostra aquí o seu dominio da perspectiva, da luz e da cor. Tamén crea na composición, por vez primeira, efectos de afastamento e proximidade. Tanto o cartón como o tapiz resultante describen un xogo de pelota. Destaca, en primeiro plano, un fumador atento ao xogo e ao espectador que contempla a obra. Aparecen xogadores, tres a tres, e outras figuras en variadas actitudes. O tapiz sitúase na sala de música do Palacio dos Borbóns do Escorial. O outro tapiz inspirado en El juego de bolos, que igualmente pertencente ao tema de cadros de costumes, reproduce un cartón do pintor madrileño Antonio González Velázquez, artista formado en Roma e autor dos frescos da igrexa de Santa Trinita degli Spagnuoli. Tras o seu regreso a España, interveu nos frescos da Basílica do Pilar e nos do Palacio Real. En 1765, foi nomeado director da Academia de San Fernando e traballou xunto a Bayeu y Mengs realizando cartóns para a Real Fábrica de Tapices. Este tapiz, como o anterior, é da segunda metade do século XVIII e nel tamén interviñeron os tapiceiros Vandergoten. Como o de Goya, este de González Velázquez foi elaborado en seda e la e mostra cinco rapaces xogando aos bolos.