Data de emisión: 17 febreiro 2009
A Loita contra o cambio climático e a colaboración co ambiente a través da campaña Plantemos para o planeta son dous dos programas lanzados por Nacións Unidas para pedir a implicación de toda a sociedade e tratar de atallar os problemas ambientais que afectan o noso planeta. Ambas as cuestións e a Conciliación da vida laboral e familiar forman a serie titulada Valores Cívicos.
Promovida pola profesora Wangari Maathai, Premio Nobel da Paz e organizada polo Programa das Nacións Unidas para o Ambiente (PNUMA), a campaña Plantemos para o Planeta ten como finalidade a plantación en todo o mundo de mil millóns de árbores ao ano. En España a proposta foi moi ben acollida e nun ano plantáronse 25 millóns de árbores e comprometéronse 100 millóns máis. Na campaña colaboran grandes empresas entre as que figura Correos quen, a través da comercialización de caixas e embalaxes ecolóxicas, dedica unha parte das súas vendas a colaborar coa fundación Bosques de la Terra.
A Loita contra o cambio climático é un dos desafíos aos que se enfronta a humanidade, polo que Nacións Unidas fixo un chamamento para que entre todos modifiquemos os hábitos de consumo e diminuamos a emisión á atmosfera de CO2. A Unión Europea é unha das organizacións internacionais máis comprometidas co ambiente e, así, incorporou ás súas obrigas o control dos gases de efecto invernadoiro para alcanzar os seguintes obxectivos: consumir enerxía menos contaminante, utilizar medios de transporte máis limpos, responsabilizar as empresas do seu uso enerxético e das emisións de CO2 sen poñer en perigo a súa competitividade, facer que a ordenación territorial e a agricultura estean ao servizo do ambiente e crear un contorno favorable para a investigación e a innovación.
Facer posible a Conciliación da vida laboral e familiar, combatendo a discriminación entre homes e mulleres traballadoras para facilitar as obrigas de ambos no seo da familia é o gran reto que se pretende conseguir. A nova lexislación recoñece a flexibilidade de horario e os permisos e excedencias por maternidade, paternidade e o coidado da familia. A igualdade de oportunidades para os pais e a coparticipación no coidado dos fillos desde o nacemento comeza a ser unha realidade.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.