Data de emisión: 02 outubro 2010
Con estes tres selos finaliza a serie Espazos Naturais de España, que ao longo do ano deu a coñecer doce dos parques existentes na nosa xeografía.
O Parque Nacional de Aigüestortes e Lago de San Mauricio encóntranse na provincia de Lleida que tras a súa reclasificación e ampliación, en 1996, abarca unha extensión de 14.119 hectáreas. A auga é o principal elemento do parque, con torrentes, fervenzas e os característicos meandros de alta montaña, as aigüestortes ou augas tortuosas. Con máis de 200 lagos, é a zona lacustre máis importante dos Perineos. Os desniveis orográficos e a diferente orientación dos vales fan que exista gran diversidade de especies vexetais, observándose bosques de freixas, álamos, faias, abetos e piñeiros silvestres. Nas zonas altas predominan as plantas resistentes ao frío. O animal máis representativo é o rebezo ou “isard” e é frecuente ver a pita do monte, o pito negro, o voitre común, a aguia real e o quebraosos. O parque conta cun dos conxuntos de arte románica máis importantes de Europa: o val de Boí, declarado Patrimonio da Humanidade pola UNESCO no ano 2000.
Unha superficie de 10.021 hectáreas (8.703 marítimas e 1.318 terrestres) forma o Parque Nacional do Arquipélago de Cabrera, que comprende as illas de Cabrera, Conejera e 15 pequenos illotes. A costa protexida esténdese ao longo de 57 km, con praias de area, calas e escarpados acantilados. No mar encóntranse paredes verticais de ata 90 m e existen cavidades e covas que atravesan os illotes. A transparencia e visibilidade das augas permiten observar gran número de algas e plantas, sendo a algaza a máis característica. A fauna mariña conta con centos de especies, como meros, polbos, moreas, golfiños, cachalotes e tartarugas mariñas. Abundan os falcóns, aguias pescadoras e diferentes clases de gaivotas. Entre a flora endémica figuran o Astragalus balearicus e o Hypericum balearicum. Na matogueira, tipo mediterráneo, aparece o lentisco, a sabina, a oliveira e o romeu. Este parque foi creado en 1991.
O Parque Natural de Gata sitúase nos termos municipais de Almería, Níjar e Carboneras. Abarca a zona sur da Serra do Cabo de Gata, de orixe volcánica e impresionantes acantilados. O parque inclúe explotacións salinas, praias e dunas, ademais dunha franxa marítima protexida de 63 km de lonxitude.Entre a fauna encóntranse anfibios, réptiles, mamíferos e aves esteparias e de humidais. Na flora distínguense a palmeira anana, única palmeira autóctona europea, e numerosas especies endémicas.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.