EXFILNA

Madrid convértese en sede da XLVIII edición da Exposición Filatélica Nacional EXFILNA 2010. Nesta ocasión, a Real Casa da Moeda é o marco de excepción onde se dan cita os máis importantes coleccionistas de España e Francia que acoden a esta edición representados polos preto de 700 cadros que ocupan as súas coleccións. Tamén nos espazos da Real Casa da Moeda están presentes a caseta de Correos e outras destinadas á feira comercial que alberga unhas 17 casetas distribuídas en dúas plantas. Coincide, ademais, esta edición de EXFILNA coa celebración dos 50 anos da Sociedade Filatélica de Madrid SOFIMA), cuxo primeiro antecedente foi o Círculo Filatélico Madrileño, fundado en 1897.

A 48 edición de EXFILNA terá lugar desde o 17 ao 24 de outubro e durante estes días teñen lugar visitas guiadas á exposición, presentacións de libros, conferencias, faladoiros e outras actividades que xiran arredor deste importante acontecemento expositivo filatélico. Madrid, cidade sede da Exposición Filatélica Nacional, unha vez máis, acolle como seu a todo aquel que a visita. Nesta cidade aberta, moderna e cosmopolita ninguén se sente estraño. En Madrid, cultura, ocio e filatelia danse a man durante este outono, estación ideal para visitar esta acolledora e atractiva cidade.

A folla bloque de EXFILNA 2010, que está dedicada aos distintos sistemas de impresión, conmemora as efemérides de catro emblemáticas emisións estampadas mediante catro sistemas de impresión: os 140 anos da Matrona en tipografía; os 80 anos de A maja espida de Goya en calcografía; os 70 anos do selo de O Cid en litografía e, por último, os 35 anos de O rei en ocogravado.

EXFILNA 2010, unha das exposicións máis importantes da filatelia española, con esta edición de Madrid vén dar un novo impulso e estímulo ao coleccionismo de selos.