FILATEM 2010. Centro Niemeyer

Con motivo da realización de FILATEM 2010 en Avilés, durante os días 19 ao 26 de xuño, Correos emite un selo que reproduce a imaxe do Centro Cultural Internacional Oscar Niemeyer que está previsto que se inaugure neste ano 2010 na mencionada cidade asturiana. No dito proxecto participan o Goberno de España e o Principado de Asturias. Será este centro un complexo cultural de relevancia internacional, de coñecemento e creación artística que contribuirá á rexeneración económica e urbanística dunha área en pleno proceso de transformación industrial como é a ría de Avilés.

Consta este primeiro proxecto do arquitecto Oscar Niemeyer, en España, dun auditorio con capacidade para 1.000 espectadores; un espazo expositivo diáfano; unha torre-miradoiro sobre a ría e a cidade; un edificio polivalente que albergará un cine, salas de ensaio, reunións, conferencias e unha praza aberta que acollerá diversas manifestacións culturais e que servirá de nexo de unión entre o Centro Cultural Niemeyer e a cidade.

A Exposición de Filatelia Temática FILATEM Avilés 2010, constitúese nun dos acontecementos máis importantes do coleccionismo filatélico temático. FILATEM nesta edición superará, por vez primeira, o ámbito europeo, pois ademais das participacións de Francia, Portugal e España, mostrará coleccións de Brasil, Cuba e Estados Unidos. De feito, Avilés, coincidindo coa realización da FILATEM, conmemora a súa irmandade coas cidades de San Agustín de la Florida (USA), Cárdenas (Cuba) e Saint Nazaire (Francia).

FILATEM 2010, exposición filatélica temática patrocinada pola Sociedade Estatal Correos e Telégrafos, realízase no Complexo Deportivo de El Quirinal. Alí mostraranse entre 300 e 350 vitrinas ou entre 600 e 700 cadros de coleccionistas adultos adscritos a distintas federacións, cuxas coleccións filatélicas temáticas son expostas con carácter competitivo. En FILATEM Avilés 2010, están representados con casetas institucionais Correos e a Real Casa da Moeda.