MODA ESPAÑOLA

Con esta folla bloque dedicada ao prestixioso modisto Manuel Pertegaz, a serie Moda española lembra os seus máis destacados creadores.

Natural de Olba (Teruel), Manuel Pertegaz mantén en segredo a data exacta do seu nacemento, que algúns datan en 1917. Aos 10 anos trasladouse coa súa familia a Barcelona e dous anos máis tarde comezou a traballar de aprendiz nun taller de xastrería. Pronto descubriu o seu interese pola moda feminina e abre, en 1942, o seu primeiro taller de alta costura en Barcelona. Ese ano presentou a súa primeira colección, caracterizada por un estilo elegante e orixinal ao que permaneceu fiel durante a súa longa carreira. En 1948 inaugura casa en Madrid e en 1954 presenta a súa alta costura en Estados Unidos e nos mellores establecementos de Nova York, Boston, Atlanta e Filadelfia, recibindo o “Óscar da Costura” da Universidade de Harvard. Tres anos máis tarde mostra as súas coleccións no Cairo, Venecia, Londres, Santiago de Chile e Copenhague. Ese ano, ao morrer repentinamente Christian Dior, propóñenlle facerse cargo da firma parisiense, pero declina o ofrecemento para seguir na alta costura española. Nos anos 60 prodúcese a súa gran revelación internacional nas galas e feiras de México e Nova York, onde os críticos destacan a orixinalidade das súas creacións. A chegada do prêt-à-porter na década dos 70 é asumida facilmente polo modisto que a compaxina coa alta costura.

Ao longo da súa carreira, Pertegaz recibiu numerosos galardóns, entre os que figuran a Medalla de Ouro da Universidade Complutense de Madrid, Medalla de Fomento das Artes Decorativas, Medalla de Ouro ao Mérito Artístico polo Concello de Barcelona, Premio Nacional de Deseño e Moda e Agulla de Ouro Honorífica, sen dúbida o premio máis prestixioso da moda española. En 2004 encargóuselle o deseño e confección do traxe de noiva da princesa de Asturias.

Na folla bloque reprodúcense, sobre un fondo rosado: un traxe de noiva en tecido labrado de seda cor marfil con debuxo de lunares, escote barco, manga xaponesa con nesga nas axilas; un traxe xastre de tafetá gris claro e fíos de lamé en prata, con solapas, colo, puños voltos e tapas nos petos; un vestido de cóctel de tafetá estampado con motivos florais, escote redondeado en dianteiro e pico nas costas e, por último, un vestido de cóctel de encaixe negro con ramiños florais sobre fondo de raso branco. O vestiario forma parte dos fondos do Museo do Traxe de Madrid.