Data de emisión: 11 febreiro 2010
Baixo o título da serie Valores Cívicos, póñense en circulación dous selos dedicados, respectivamente, á Reciclaxe e ao Consumo responsable.
A frase tan expandida nas últimas décadas de “usar e tirar” podería ser substituída pola de “usar e reciclar” promovendo, así, a redución de desperdicios e a reutilización dos materiais usados. A reciclaxe consiste en someter un material xa utilizado a un proceso para que se poida volver a utilizar.
A acumulación de desperdicios é algo que preocupa cada vez máis á humanidade, polo que Nacións Unidas insta aos Gobernos, á industria e aos particulares a estimular a reciclaxe, activar a utilización de produtos biodegradables e a desenvolver sistemas de xestión de residuos para evitar a contaminación que causan no ambiente. No ámbito individual, o reciclado comeza coa separación dos envases do resto do lixo co uso os correspondentes colectores: de cor azul para papel e cartón; amarelo para envases de plásticos e latas; verde claro para o vidro e verde escuro para residuos que non teñen cabida nos grupos anteriores, principalmente materia orgánica. Correos, ao igual que outras empresas e institucións, colabora na sustentabilidade do ambiente coa venda de envoltorios de material reciclable.
Para ilustrar o selo utilizouse o símbolo internacional da reciclaxe, representado por tres frechas en forma de triángulo sen principio nin fin. Dentro deste quedan enmarcados varios sobres de papel en continuo proceso de reciclado.
Cambiar os hábitos de consumo, mercar o que verdadeiramente é preciso e elixir os produtos máis respectuosos co ambiente son algunhas das reflexións que se formulan ao falar de consumo responsable. Cada día son máis as voces que se erguen a prol deste asunto e tanto as asociacións ecoloxistas como as Nacións Unidas fan un chamamento para diferenciar entre o consumo necesario e o consumo excesivo, principalmente nos países industrializados. A responsabilidade inclúe, tamén, a posibilidade que ten o consumidor de elixir entre os produtos ofertados, esixindo o cumprimento de determinadas garantías sociais, éticas, solidarias e de protección do ambiente.
No selo figura o lema “ponlle tope ao consumo” e para o deseño utilizáronse conceptos abstractos encerrados nun bote baixo cadeado. Os dous selos foron creados polo estudio de Jesús Sánchez.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.