AÑO INTERNACIONAL DE LA QUÍMICA

A Asemblea Xeral das Nacións Unidas proclamou 2011 como Ano Internacional da Química e a filatelia únese ao evento coa emisión dun selo conmemorativo. A iniciativa foi proposta pola UNESCO e a IUPAC, co fin de promover o papel que desenvolve a química na sociedade, suscitar o interese desta disciplina científica entre a mocidade e axudar o público en xeral a comprender e apreciar esta ciencia.

O ano 2011 coincide co centenario da concesión do Premio Nobel de Química a Marie Curie e á fundación da Asociación Internacional de Sociedades Químicas. Ao longo do ano, prevíronse realizar diferentes actividades en todo o mundo baixo o lema “Química, a nosa vida, o noso futuro”, recordando que a química é esencial para mellorar os nosos modos de vida ao estar presente na produción de alimentos, medicinas e en multitude de produtos manufacturados.

A Premio Nobel de Química, Marie Curie, nome de soltera María Sklodowska, foi unha científica francesa de orixe polaca. Filla dun distinguido profesor, naceu en Varsovia en 1867, onde estudou ata os 24 anos, momento no que se trasladou a París para ampliar estudos na Universidade da Sorbona. Licenciada en Ciencias Físicas y Matemáticas, en 1895 casou co físico francés Pierre Curie, converténdose na súa máis eficaz colaboradora. Uns anos máis tarde obtivo o doutoramento cunha tese dedicada ás sustancias radioactivas. En colaboración co seu esposo descubriu, en 1898, dous novos elementos químicos: o polonio, chamado así como referencia ao seu país natal, e o radio.

En 1903 recibiu o Premio Nobel de Física compartido co seu home e o físico Henri Becquerel por descubrir a radioactividade. Tras a morte do seu esposo, en 1906, obtivo a cátedra de Física da Sorbona, converténdose na primeira muller que impartiu clases na Universidade de París. Autora de varios libros e fundadora do Instituto do Radio, en 1911 recibiu o Premio Nobel de Química, sendo a primeira persoa que recibiu por dúas veces esa distinción. Marie Curie morreu en 1934 cerca de Salanches (Francia).