BIODIVERSIDAD Y OCEANOGRAFÍA

Con esta emisión difúndese a importancia que a oceanografía -ciencia dedicada ao estudo dos mares, os seus fenómenos, a fauna e a flora mariña- e a biodiversidade -variedade de especies animais e vexetais no seu medio- teñen na sociedade actual. Por este motivo, a ONU declarou 2010 Ano Internacional da Biodiversidade” e a UPU (Unión Postal Universal) instou os correos do mundo a conmemorar nos seus selos a efeméride.

Liderado polo Consello Superior de Investigacións Científicas (CSIC), púxose en marcha a expedición de circunvalación Malaspina 2010, un proxecto interdisciplinar que cumpre o dobre obxectivo de “avaliar o impacto do cambio global sobre o océano e explorar ese ecosistema aínda tan descoñecido que é o océano profundo”. Durante sete meses a expedición dará a volta ao mundo a bordo do buque oceanográfico Hespérides, da Armada Española, ao que se une o Sarmiento de Gamboa, para realizar a travesía das Palmas a Santo Domingo. No proxecto participan 250 investigadores de 19 institucións españolas -como o Real Observatorio Astronómico da Armada, o Museo Naval e o Instituto Hidrográfico da Mariña- que realizan probas en 350 estacións oceanográficas, de ata 5.000 metros de profundidade, e recollen miles de mostras de aire, auga e plancto.

A expedición recibe o nome do mariño español, de orixe italiana, Alejandro Malaspina, celebre por dirixir a primeira expedición española de carácter científico que circunvalou a terra a finais do século XVIII.

Alejandro Malaspina (Mulazzo 1754-Pontremoli 1810) ingresou en 1774 na Mariña Real Española, tomando parte en accións contra os británicos. En 1780 foi nomeado tenente de navío, comezando a realizar viaxes científicas. Co seu compañeiro mariño, J. Bustamante e Guerra, levou a cabo, entre 1789 e 1794, a famosa expedición de carácter científico-política Malaspina, na que participaron naturalistas, científicos e cartógrafos. Á súa volta a España presentou un informe no que facía observacións críticas sobre as colonias españolas.

O selo, deseñado polo estudio Jesús Sánchez, debuxa unha paisaxe composta polo ceo e o mar, sucado polo buque Hespéride, e na auga reflíctese a imaxe da corveta Atrevida, que acompañou á primeira expedición dirixida por Malaspina, nun dos ángulos do timbre, un frasco de cristal, simboliza o importante contido científico da expedición.