CATEDRALES. Catedral de Sigüenza

Dentro da serie de emisións de Catedrais dedícaselle un selo e unha folla bloque á de Sigüenza. Reproduce o selo a sancristía maior, mentres que na folla bloque aparece unha panorámica da fachada principal e do resto do conxunto catedralicio.

A medida que un se aproxima á cidade de Sigüenza, xa desde a contorna, destaca o impresionante edificio da súa catedral. Segundo desde onde se contemple esta, pode ofrecer a aparencia de fortaleza se é vista desde a súa fachada de poñente, onde destacan dúas fermosas torres ameadas, entre as que localizamos protexidas e abrazadas tres fermosas portadas románicas do século XIII, sendo a central do Evanxeo a que serve de acceso principal ao templo e que se ve coroada por un espléndido e non menos fermoso rosetón. Do lateral que dá á praza Maior seguntina, destaca unha esvelta torre xunto á que se acaroa outro impresionante rosetón que lle dá luz ao cruceiro e baixo o que hai unha portada neoclásica; este, unido ás fiestras superiores a través das vidreiras, facilítalle luz ao interior. No conxunto, tanto do exterior como do interior, predominan elementos característicos do estilo gótico cisterciense.

Dentro da catedral, cuxa construción, por iniciativa do bispo Bernardo de Agen, se iniciou cara a 1124 e prolongaríase ata o século XVI e incluso ata o XVIII, no concernente ao adorno dalgunhas capelas, chaman a atención as súas tres naves; a central está ocupada polo retablo maior e o coro de cadeirado gótico, mentres que as laterais mostran, de esquerda a dereita, as capelas de San Pedro, de Santiago ou dos Gamboa, da Anunciación, de San Marcos, sancristía da capela de Santa Librada, a sancristía maior ou das Cabezas, obra renacentista singular, a capela do Espírito Santo e a do Cristo da Misericordia. Xa no cruceiro, no lado sur, encontramos a capela dos Arce, destinada desde finais do século XV a enterramentos desta nobre familia seguntina, é aquí onde localizamos o maxistral sepulcro de Martín Vázquez de Arce, o célebre doncel de Sigüenza.

A catedral, dadas as distintas fases da súa construción, reúne nos seus altares, capelas, claustro e sancristías, magníficos exemplos do románico, gótico, renacemento, barroco e plateresco, entre outros estilos artísticos