CENTENARIO DE LA AVIACIÓN MILITAR ESPAÑOLA

Como conmemoración do Centenario da Aviación Militar Española emítese unha folla bloque con catro selos nos que se reproducen tres modelos de avións e un helicóptero, mentres que na folla aparece o logo alusivo ao Centenario.

A Cuatro Vientos chegaron, en febreiro de 1911, procedentes de Francia, dous avións Henry Farman e un Maurice Farman adquiridos polo capitán de enxeñeiros Alfredo Kindelán. Con isto, os terreos de Cuatro Vientos converteríanse no primeiro aeródromo militar. Un mes despois, con estes avións de madeira e tea e motor de 50 CV, iniciouse o primeiro curso para pilotos militares. Nel obtiveron os seus títulos os capitáns Kindelán, Herrera e Arrillaga e os tenentes Barrón e Ortiz Echagüe. Con eles iniciouse a historia e a andaina da aviación militar española.

O helicóptero Aerospatiale SA-332 “Super Puma” entrou en servizo en 1982 e con el mantense unha “alerta SAR” (busca e salvamento) de 24 horas, todos os días do ano en Baleares, Canarias e Madrid. Ademais de utilizarse en Herat (Afganistán) para aeroevacuacións sanitarias, tamén se emprega para o movemento de personalidades. Está equipado con dúas turbinas que desenvolven 1850 CV cada unha e ten un radio de acción de 200 millas náuticas.

O avión CASA-101 “Aviojet”, está en servizo desde 1984 e con el formáronse máis de 1200 pilotos militares. Desenvolvido e fabricado en España, é un monomotor bipraza destinado ao ensino básico e avanzado. Ten unha autonomía de seis horas de voo e é o avión da patrulla acrobática Águila e a imaxe do Exército do Aire.

O Lockheed C/KC-130 “Hércules”, en activo desde 1973, é por excelencia o avión de transporte táctico. Véñense utilizando en operacións de axuda humanitaria, de mantemento da paz e en exercicios. Dotado de catro motores T-56 turbohélices, está destinado ao transporte de paracaidistas e lanzamento en voo de material, xa que pode transportar ata 20 toneladas de carga en bodega.

O Eurofighter EF-2000 “Tifón”, entrou en servizo no ano 2003 e é o avión máis moderno do Exército do Aire. Está dotado de dous motores e destinado a defensa e ataque. A súa velocidade é dúas veces a do son. Posúe un radar cun alcance de máis de 150 km e pódeselle adaptar unha gran variedade de armamento.