DÍA INTERNACIONAL DE LA MUJER

Coincidindo co Día Internacional da Muller, que se celebra anualmente o 8 de marzo, emítese un selo conmemorativo que pon de relevo os avances realizados para conseguir a igualdade da muller en todas as esferas da sociedade.

A idea de festexar o Día Internacional da Muller xurdiu a finais do século XIX, pero non se faría realidade ata o XX, cando as organizacións internacionais comezaron a proclamar unha xornada de loita en favor da muller e dos seus dereitos. Seguindo esta idea, en 1910 reuniuse en Copenhague a Conferencia Internacional de Mulleres Socialistas quen, coa aprobación por unanimidade de todas as asistentes, declarou o día da muller de carácter internacional.

O 19 de marzo de 1911 celebrouse, por primeira vez, o Día Internacional da Muller en Alemaña, Austria, Dinamarca e Suíza, con mitins nos que se esixiron o dereito ao voto, a ocupar cargos públicos, ao traballo, á formación profesional e á non discriminación laboral. En 1913, as mulleres rusas celebraron o seu día con movementos en favor da paz pouco antes da Primeira Guerra Mundial. En 1917, xa en plena guerra, volveron mobilizarse pedindo “pan e paz”. Coas súas reivindicacións lograron o dereito ao voto.

Ao longo destes cen anos, o movemento do Día Internacional da Muller viuse reforzado polo apoio das Nacións Unidas e as catro conferencias celebradas en pro dos dereitos da muller, da igualdade, a xustiza, o desenvolvemento e a súa participación na vida política. A data oficial estableceuse para o 8 de marzo.

Non obstante, a situación da muller en gran parte do mundo segue sendo discriminatoria con respecto ao home, polo que as institucións internacionais continúan afondando na defensa dos seus dereitos.

Nos países da Unión Europea trabállase intensamente na promoción da igualdade entre homes e mulleres. En España, en 2007, promulgouse unha lei sobre este tema, que obriga as empresas a adoptar medidas que eviten a discriminación. Para estimular e recoñecer o labor das empresas comprometidas coa Lei de Igualdade, creouse un distintivo que se concede a aquelas que destacan pola aplicación da igualdade no traballo, nos modelos organizativos, nos servizos, produtos e publicidade. O seu lema: “Igualdade na empresa”, é o que se reproduce no selo.