AÑO INTERNACIONAL DE LA ENERGÍA SOSTENIBLE PARA TODOS

A Asemblea Xeral das Nacións Unidas proclamou 2012 como Ano Internacional da Enerxía Sostible para Todos, e adheríndose ao evento, ponse en circulación un selo conmemorativo que difunde esta mensaxe universal.

Desde hai máis de catro décadas véñense realizando reunións internacionais sobre o ambiente nas que se propuxeron novos modelos de desenvolvemento económico e ambiental. No marco destas actuacións, as enerxías renovables -obtidas de fontes naturais inesgotables como a auga, o sol ou o vento-, e o uso de tecnoloxías menos contaminantes constitúen os puntos nos que se fixo maior fincapé. A enerxía sostible para todos compaxina ambos os contidos, xa que combina a utilización de recursos enerxéticos renovables coas baixas emisións de contaminación, para tratar de satisfacer as necesidades do presente sen comprometer as necesidades das xeracións futuras.

Enténdese por enerxía sostible: “a enerxía que se produce e se usa de forma que apoie a longo prazo o desenvolvemento humano no ámbito social, económico e ecolóxico”. Por tanto, o uso desta enerxía está unido a un futuro sostible para o desenvolvemento. Como parte da iniciativa “Enerxía Sostible para Todos”, Nacións Unidas puxo en marcha unha Rede de Profesionais para o Acceso á Enerxía que centra os seus esforzos en conseguir enerxía eléctrica para fins produtivos no ámbito domestico e comunitario, que comprende aplicacións específicas para a saúde, a agricultura, a educación, a pequena empresa e o fogar. Non hai que esquecer que máis de 3.000 millóns de persoas dependen da biomasa e do carbón como principais fontes de enerxía, e 1.400 millóns carecen de electricidade no fogar.

O Ano Internacional da Enerxía Sostible para Todos ofrece a oportunidade de tomar conciencia sobre a importancia de incrementar o acceso sostible á enerxía, a eficiencia enerxética e a enerxía renovable.

O selo, deseñado polo estudo de Jesús Sánchez, toma como eixe principal o aproveitamento das fontes naturais inesgotables, como a enerxía eólica e a solar. O significado “para todos” represéntase pola capacidade de producir enerxía autosuficiente nun lugar illado, como é a cabana iluminada, facendo uso deses recursos naturais.