Data de emisión: 16 marzo 2012
Un dos edificios máis fermosos e representativos da arte gótica europea é a Catedral de Burgos, excepcional conxunto arquitectónico do que Correos emite unha folla bloque dentro da serie dedicada ás Catedrais.
Este fermoso templo, como a maioría dos da súa categoría, foise construíndo ao longo de varios séculos. De feito, iniciouse a súa construción no ano 1221, por mandato do rei Fernando III o Santo, sendo bispo don Mauricio, e foi consagrada en 1260. As súas obras prolongáronse ata o ano 1765. Co paso do tempo, ao edificio inicial, que conta con tres naves, deambulatorio, nave transversal, sancristía e 19 capelas, fóronselle sumando outras construcións como o claustro. No século XV, por encargo do bispo Alonso de Cartagena, Juan de Colonia levantou as esveltas agullas que coroan as torres da fachada principal e a finais deste mesmo século, Simón de Colonia encargouse de construír, para o condestable de Castela, don Pedro Fernández de Velasco, a denominada capela dos Condestables. Renacentista é o retablo da capela maior onde destaca a talla de Santa María a Maior.
No século XVI construíuse o ciborio do cruceiro e a espléndida e bela Escaleira Dourada, obra excepcional de Diego de Siloé, para a que este se inspirou no renacemento italiano. Do século XVIII é a capela de Santa Tegra, da que destaca a súa peculiar decoración barroca. Sábese que interviñeron na construción da catedral numerosos e acreditados artífices como o mestre Enrique, Pedro Sánchez, Juan Pérez, Juan Vallejo e Francisco de Colonia. De igual xeito, interviñeron escultores como Gil e Diego de Siloé, pintores como Alonso de Sedano e mestres vidreiros como Arnao de Flandes. Outras capelas destacables son as da Presentación, das Reliquias, de Santiago, da Visitación, etc. Do exterior salientamos, ademais da fermosa panorámica que ofrecen as súas estilizadas torres xemelgas, situadas na súa fachada principal na que achamos a súa porta Real ou do Perdón, o seu impresionante rosetón e a galería de imaxes pétreas que conforman as figuras dos oito Reis de Castela sobre os que aparece a imaxe de Santa María. Tamén do exterior, pola súa ornamentación e singular construción, chaman a atención as súas portas do Sarmental, do século XIII, a tamén gótica da Coronería ou dos Apóstolos e a da Pellejería, esta última construída por Francisco de Colonia en 1516.
Pola súa magnitude e beleza, a Catedral de Burgos obtivo o merecido título de Patrimonio da Humanidade no ano 1984.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.