MODA ESPAÑOLA

A serie Moda española aparece dedicada ao deseñador Pedro del Hierro, recoñecido tanto nas pasarelas nacionais como internacionais.

Fillo dun pintor, Pedro del Hierro (Madrid, 1948) mostra desde moi novo dotes artísticos polo debuxo e a moda, compoñendo deseños de grande orixinalidade. Tras adquirir formación e coñecementos no oficio da moda, en 1974 presenta a súa primeira colección. Dous anos máis tarde, 1976, ingresa na Cámara de Alta Costura e mostra as súas coleccións en Nova York, diversos países de América Latina e Europa, onde comeza a ser recoñecido. En 1981 abre a súa propia tenda nuns grandes almacéns, simultaneando o prêt a porter coa alta costura e a creación de vestidos para personalidades e acontecementos de carácter internacional. En 1987 embárcase en novos proxectos relacionados coa moda e os seus complementos. O seu prestixio vai en aumento e no ano 1990 comeza a deseñar moda para home.

Pedro del Hierro entende a moda “como un proceso evolutivo en constante cambio” e inspírase nos obxectos da vida mesma para vestir con dinamismo e elegancia xente nova e maiores. Nos selos reprodúcense imaxes, cedidas por Cortefiel, que aparecen no catálogo da exposición realizada sobre o deseñador no Museo do Traxe, Madrid, onde se conservan estas pezas únicas. O primeiro dos selos presenta un traxe longo e asimétrico confeccionado en satén de cor framboesa tornasolada. Ten amplo escote, co ombreiro dereito cuberto. A decoración de abelorios de cristais van selados con láser. Ao lado, un vestido realizado en tea de encaixe de cor vermello e marfil, con debuxos de flores e abelorios de diferentes cores. Escote en forma de V e escaves remetidos.

Debaixo, vestido de festa curto por diante e longo por detrás, plisado a man en cor rosa tornasolada con fíos metálicos en marrón. Está composto de dúas partes: un vestido interior con saia de voo, curto na dianteira e longa cola nas costas, e un vestido curto sobreposto rosa. Por último, traxe en tule de seda con escote en pico e saia evasé de voo. Vai aberto desde a cadeira ao baixo e decorado con flores recortadas en tecido cor crúa.