Data de emisión: 27 febreiro 2012
Desde que Xoán Carlos I foi proclamado rei de España, o día 22 de novembro de 1975, a efixie do monarca español, da raíña e dos membros da familia real apareceu en diversas emisións. É o rostro do rei o que máis aparece, ano tras ano, nos selos. De aí que, dentro das emisións deste ano, se inclúan catro selos de Correos coa súa efixie da denominada Serie Básica, cuxa función, como xa vén sendo tradicional, é a de atender, con catro valores distintos, as necesidades postais.
O primeiro selo emitido en España en 1850 xa reproducía a imaxe dunha raíña, concretamente de Isabel II. Desde aquela ata hoxe, dependendo do momento histórico do país, foron varios os monarcas que viron plasmada a súa imaxe nos selos españois. Se botamos unha mirada ao extenso catálogo de selos do noso país veremos que á devandita raíña Isabel II, a seguiron as efixies de Amadeo I, en 1872; a de Carlos VII, utilizada no correo carlista entre 1873 e 1875 en Vascongadas, Navarra, Cataluña e Valencia; a de Afonso XII, desde 1875 ata a última emisión de 1882; as dedicadas a Afonso XIII que nas emisións de 1889 e 1899 mostran a imaxe dun monarca aínda neno, ás que seguen outras moitas emisións que presentan a evolución do rostro e madurez do rei ata comezos dos anos 30. Tamén, nos valores emitidos Pro Cruz Vermella Española, en 1926, aparecen ademais de Afonso XIII, a raíña Vitoria Uxía, o príncipe de Asturias, as infantas Cristina e Beatriz e incluso a familia real ao completo. Tras unha paréntese marcada pola II República Española e o longo período de Ditadura do xeneral Franco, a imaxe da Monarquía volveu a verse impresa nos selos españois, tras a morte do ditador en 1975. De aí, que a primeira emisión na que aparecen os reis de España, don Xoán Carlos I e dona Sofía, será en decembro de 1975. Desde ese momento a hoxe, as viaxes dos monarcas, o nomeamento de Filipe de Borbón como príncipe de Asturias, as emisións dedicadas aos reis da Casa de Borbón e á actual familia real, as intervencións do rei en organismos internacionais como Nacións Unidas, o 25 aniversario do reinado de don Xoán Carlos e da Constitución española, así como a voda dos príncipes de Asturias, todos estes acontecementos aparecen plasmados nos selos de Correos.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.