América UPAEP. Lucha contra la trata

AMÉRICA UPAEP. NON AO TRÁFICO

O tráfico ou comercio ilegal de persoas con fins ilícitos é unha violación dos dereitos humanos, que atenta contra a liberdade e a dignidade das vítimas.

Os prexudicados son na súa maioría mulleres e nenos que foron captados con engano, coacción, abuso de poder e mesmo raptados co fin de trasladalos a outras rexións ou países diferentes, e así os someter a unha explotación sexual e/ou laboral, a traballos forzados, a escravizalos e mesmo á extracción ilegal de órganos.

Este delito de lesa humanidade converteuse nun fenómeno de carácter global e alcanzou tales cotas, máis de 4 millóns de persoas explotadas, que se coñece, hoxe en día, como a escravitude do século XXI. O negocio do tráfico move decenas de miles de millóns de dólares por ano no mundo, sen contar cos máis de 12,3 millóns de persoas que sofren situacións semellantes á escravitude, segundo denuncia a OIT. En América latina máis de dous millóns de nenos e adolescentes sofren o abuso sexual, comercial ou laboral e na propia Unión Europea podería haber ao redor de 275.000 vítimas do tráfico de persoas, segundo cifras das Nacións Unidas.

Esta organización adoptou no ano 2000, o Protocolo contra a Trata de Persoas, para previr, reprimir e sancionar este tipo de delito. O protocolo é un dos tres aprobados na Convención das Nacións Unidas contra a Delincuencia Organizada Transnacional, coñecida tamén como a Convención de Palermo. A intención deste instrumento legal é facilitar a converxencia no establecemento de penas nacionais que apoien a cooperación internacional eficaz na investigación e o axuizamento de casos relacionados co tráfico de persoas. O outro obxectivo do Protocolo é o de protexer e asistir ás vítimas de tráfico con pleno respecto dos seus dereitos humanos.

A emisión de América-UPAEP deste ano dedícase a apoiar a loita contra o tráfico de persoas, que en América é especialmente grave, no caso dos nenos, e en Europa sobre todo se ceba nas mulleres, que son traídas con engano ou coacción de países da Europa oriental e do continente africano. A solitaria silueta dunha muller serve de recordo a estas vítimas.