Data de emisión: 02 xaneiro 2015
ARCOS E PORTAS MONUMENTAIS
Esta emisión ―formada por un carné con selos autoadhesivos de tarifa A para o franqueo das cartas nacionais normalizadas― aparece dedicada a catro portas monumentais que dan acceso a recintos amurallados de distintas localidades españolas.
A Porta da Lúa, en Córdoba, encóntrase situada entre as portas de Sevilla e de Almodóvar, na parte máis occidental da muralla. Presenta unha dobre entrada en revolta que dá acceso ao barrio xudeu. A cidade milenaria de Córdoba conserva parte das súas antigas murallas de orixe romana, que foron reconstruídas posteriormente polos musulmáns e ampliadas. En época cristiá engadíronse novos espazos amurallados. A zona histórica de Córdoba foi declarada Patrimonio da Humanidade en 1994.
A Porta da Cadea, en Brihuega (Guadalaxara), é unha das cinco portas que antigamente daban entrada á localidade. Sobre o arco de medio punto encóntrase unha placa que conmemora o asalto a Brihuega polas tropas de Felipe V en 1710, durante a Guerra de Sucesión. Sobre esta placa áchase outra que rememora a batalla dous séculos despois. Sobre ambas as dúas placas sobreponse un nicho cunha imaxe da Inmaculada Concepción.
A Porta de Santa María, en Hondarribia ou Fuenterrabía (Gipuzkoa), foi construída no século XVI tras o incendio que arrasou a antiga vila medieval. Consta dun arco rebaixado sobre o que se asenta o escudo da cidade, de 1694, e a súa patroa, a Virxe de Guadalupe flanqueada por dous anxiños. É unha das dúas entradas principais á zona histórica e pola que se accede á rúa maior, na que se encontran casas brasonadas, igrexas, pazos e monumentos. A porta aínda conserva os gonzos.
A Porta de Sant Pere, tamén coñecida como a do Papa Lúa, en Peñíscola (Castelló) é unha das tres portas que dan entrada ao recinto amurallado da cidade mariñeira. Foi mandada construír polo Papa Lúa, no século XV, para dar acceso polo mar. Está formada por un grande arco rebaixado sobre cuxa doela central se encontra o escudo do Papa Lúa, esculpido por Filibert Bertalla.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.