D.O. Protegidas de Galicia

GASTRONOMÍA. DENOMINACIÓNS DE ORIXE PROTEXIDAS

Iníciase unha nova temática dedicada ás Denominacións de Orixe Protexidas (DOP) que difunde aqueles produtos que contan con esa designación. A emisión terá continuidade nos próximos anos e, nesta ocasión, está dedicada a Galicia e á Pemento de Herbón e o Mexillón de Galicia. Ambos os dous produtos reprodúcense na folla bloque e nos dous selos que a forman.

"Uns pican e outros non", din dos Pementos de Padrón. Todo depende da cantidade de capsicina que conteñan, que é o compoñente que achega máis picante. Este pequeno froito de cor verde foi recoñecido coa Denominación de Orixe Protexida o 1 de xullo de 2009: Pemento de Herbón. A súa produción limítase a unha área da vertente atlántica que comprende un conxunto de vales de reducida altitude, delimitados polos ríos Ulla e Sar, e protexidos por varias serras que illan a zona e proporcionan o clima adecuado para o cultivo. Esta variedade de pemento foi introducida polos monxes franciscanos do convento de santo Antonio de Herbón, do Concello de Padrón, no século XVII, os cales trouxeron as sementes dende o estado mexicano de Tabasco e iniciaron o seu cultivo.

O Mexillón de Galicia, rico en minerais (ferro, fosfato e cinc) e en vitaminas, é un molusco de apreciado sabor gastronómico que admite múltiples receitas. O Consello Regulador do Mexillón de Galicia iniciou as súas actividades en 1994 co fin de fomentar a calidade deste produto tan recoñecido hoxe en día. Pola súa situación xeográfica, as rías galegas constitúen unha contorna especial para a cría do mexillón, xa que concentran unha importante fonte de nutrientes propiciada pola confluencia das correntes oceánicas e fluviais. O cultivo do molusco faise en bateas e, practicamente, a maioría dos produtores e das empresas que comercializan o mexillón, tanto fresco coma transformado, encóntranse adheridas á Denominación de Orixe.

En 1945 fondeouse a primeira batea na ría de Arousa. Uns anos máis tarde converteuse nun cultivo de gran desenvolvemento no mundo da acuicultura e nun dos recursos económicos máis importantes para as vilas da zona.