Efemérides. ONU y Fco. Alvarez de Toledo

EFEMÉRIDE
Conmemórase o 70 Aniversario da ONU e o 60 Aniversario do ingreso de España na devandita organización cun selo cuxa plástica simula as bandeiras do mundo en movemento. Dinamismo que suxire avanzar cara ao futuro nas múltiples tarefas que desenvolve esta grande organización mundial.
En 1945, tras rematar a II Guerra Mundial, as nacións estaban destruídas e o mundo quería paz. Nese contexto nacían oficialmente as Nacións Unidas o 24 de outubro de 1945, despois de que a maioría dos 51 Estados membros asinantes do documento fundacional da organización, a Carta da ONU, a ratificaran. Os principais propósitos perseguidos son: manter a paz e a seguridade internacional; fomentar as relacións de amizade entre as nacións respectando o principio de igualdade; realizar tarefas de cooperación internacional no ámbito económico, social e humanitario, e no desenvolvemento do respecto aos dereitos e as liberdades; e, finalmente, servir de centro para combinar os esforzos das nacións e alcanzar estes obxectivos. Na actualidade, a ONU está formada por 193 Estados e a súa sede principal radica en Nova York.
España ingresou na ONU o 14 de decembro de 1955: poñía así fin á condena feita pola organización ao réxime de Franco, en 1946.
O V Centenario do nacemento de Francisco Álvarez de Toledo recórdase co selo no que aparece un retrato do personaxe sobre o mapa de Perú.
Francisco Álvarez de Toledo (Oropesa, 1515-Gradúa, 1582) foi vicerrei de Perú entre 1569 e 1581. Durante o seu mandato perseguiu dous obxectivos principais: consolidar os dereitos e privilexios reais fronte ao poder dos encomendeiros e frear as continuas sublevacións indíxenas. Para iso levou a cabo unha reforma da administración a través das Ordenanzas do vicerrei Toledo, redactadas durante unha viaxe de dous anos na que coñeceu a demografía do terreo e a organización administrativa inca. Neste sentido, aproveitou as institucións existentes como a 'mita', un sistema de traballo obrigatorio entre os indíxenas polo que recibían un mínimo salario controlado polas autoridades. Nunha das sublevacións ordenou a execución de Tupac Amaru, o último rei dos incas.