Data de emisión: 03 marzo 2015
MUSEOS
Por segundo ano consecutivo, a filatelia difunde na serie Museos as coleccións e centros de arte máis prestixiosos do patrimonio español. Nos selos reprodúcense obras significativas dos museos que forman un atractivo Prego Premium.
O Museo Arqueolóxico Nacional, en Madrid, fundouse en 1867, baixo o reinado de Isabel II, para reunir nunha grande institución as coleccións dispersas polos distintos centros existentes nesa época. No Real decreto de creación asignáronselle os fondos procedentes do Museo de Medallas e Antigüidades da Biblioteca Nacional, os do Real Gabinete de Historia Natural (actual Museo de Ciencias Naturais) e os da Escola Superior de Diplomática. Estes fondos ampliáronse con doazóns e compras a particulares, e coas pezas recuperadas polas Comisións Científicas, formadas por persoal do museo, que percorreron parte de España e do estranxeiro. Entre estas, figura a colección de obxectos arqueolóxicos traídos de Sicilia, Atenas, Chipre, Troia e Constantinopla.
Na década de 1940, e debido ao intercambio de obras de arte con Francia, ingresan no centro algunhas das pezas máis emblemáticas, como as coroas de Guarrazar e a Dama de Elx. Nesa mesma época, o museo especialízase como arqueolóxico e parte das súas coleccións transfírense aos museos nacionais de Antropoloxía, Artes Decorativas e América. Nos anos setenta incorpóranse obras tan emblemáticas como a Dama de Baza e o monumento de Pozo Mouro. En 2008 iniciáronse as obras de reforma e ampliación do edificio que, tras permanecer pechado varios anos, abriu de novo as súas portas totalmente reformado o 1 de abril de 2014.
O Museo Thyssen-Bornemisza, situado no Pazo de Villahermosa, Madrid, inaugurouse en outubro de 1992. Os fondos artísticos están formados pola colección Thyssen-Bornemisza, adquirida polo Goberno español en 1993, e a Colección Carmen Thyssen-Bornemisza, da mesma propiedade e depositada no museo dende 2004. Ambos os dous conxuntos reúnen preto de mil obras de arte, principalmente pintura, que abranguen dende o século XIII ata finais do XX. Entre as grandes sinaturas figuran Van Eyck, Carpaccio, Durero, Caravaggio, Frans Hals, Van Gogh, Gauguin, Mondrian, Klee e Hopper, entre outros moitos.
Unha parte importante dos fondos do museo inclúen algúns movementos artísticos dos que carecían as dúas grandes pinacotecas madrileñas, o Prado e o Raíña Sofía. Estes movementos fan referencia ao Fauvismo, Impresionismo, Expresionismo alemán, vangardas de principios do século XX e pop art. Así mesmo, cómpre salientar a colección de pintura norteamericana do século XIX, considerada única no ámbito museístico europeo. O Museo Thyssen xunto co Prado e o Raíña Sofía forman o Triángulo da Arte máis importante de Europa.
O Museo Lázaro Galdiano, en Madrid, abriu as súas portas ao público o 27 de xaneiro de 1951. Os seus fondos contan cunha colección heteroxénea de máis de 13.000 pezas que foron reunidas por José Lázaro Galdiano, quen ao morrer legou todo o material para a formación e o goce das futuras xeracións. O museo sitúase no pazo de Parque Florido, residencia do coleccionista, e nas súas catro plantas móstranse unha coidadosa selección de obras que abrangue pinturas, debuxos, gravados, abanos, armas, bronces, cerámicas, esculturas, esmaltes, medallas, mobiliario, ourivaría, téxtiles e vidros, entre outras artes decorativas.
O pazo de Parque Florido conserva, nalgunhas plantas, a decoración e distribución orixinais, cos teitos pintados, os zócolos de mármore, madeira ou estuco e os chans de marquetaría. Entre as obras máis valiosas figuran unha colección de lenzos e gravados de Goya e pinturas do Greco, Murillo, Velázquez, Carreño ou Zurbarán. Así mesmo, mostra unha selección de pinturas das escolas europeas máis importantes, como a italiana, flamenca, alemá, holandesa, francesa e inglesa. A Fundación Lázaro Galdiano conta, tamén, cunha biblioteca de máis de 20.000 volumes, entre eles manuscritos, libros de horas, estampas, debuxos e libros raros e curiosos.
Tarifa A - 0,75 €. Para Carta ou Tarxeta postal Nacional Ordinaria "normalizada", ata 20 g.
Tarifa A2 - 0,85 €. Para Carta ou Tarxeta postal Nacional Ordinaria “normalizada”, de 20 a 50 g.
Tarifa B - 1,65 €. Para Carta ou Tarxeta postal Internacional Ordinaria "normalizada" dirixida a Europa (incluída Grenlandia), ata 20 g.
Tarifa C - 1,75 €. Para Carta ou Tarxeta postal Internacional Ordinaria "normalizada" dirixida ao resto do mundo (a excepción EEUU, Canadá, Xapón, Australia e Nova Zelandia), ata 20 g.
Tarifa D - 2,10 €. Para Carta ou Tarxeta postal Internacional Ordinaria "normalizada" dirixida a EEUU, Canadá, Xapón, Australia e Nova Zelandia, de 20 g.