Patrimonio Inmaterial de la Humanidad (RA)

PATRIMONIO INMATERIAL DA HUMANIDADE
O Silbo Gomeiro e a Dieta Mediterránea, motivos da emisión, forman parte do Patrimonio Inmaterial da Humanidade. A lista que forma este patrimonio componse de elementos que, pola súa singularidade etnográfica e cultural, han de ser protexidos para asegurar a súa transmisión ás xeracións futuras.
O Silbo Gomeiro, propio da illa de La Gomera (Canarias), é a única linguaxe asubiada do mundo totalmente desenvolvida e practicada por unha comunidade numerosa. A súa técnica, dotada de certa complexidade, consiste en reproducir con asubíos a lingua falada, de forma que as vogais e consoantes son substituídas por asubíos diferenciados que se distinguen polo seu ton, a súa interrupción ou a súa continuidade. Este medio serviu historicamente para comunicarse a través dos profundos barrancos da illa e o seu ensino transmitiuse de mestres a discípulos e no seo familiar. En 1999, para evitar a súa desaparición, o Goberno de Canarias incluíu a súa aprendizaxe nas escolas. No ano 2009, o silbo gomeiro foi inscrito pola UNESCO na lista do Patrimonio Inmaterial da Humanidade.
O selo ilústrase coa obra do pintor francés Bernard Romain (Roanne, 1944). Incorpora Realidade Aumentada (RA), na que se escoita a frase asubiada: "Emisión do selo dedicado por Correos ao Silbo Gomeiro, Patrimonio Inmaterial da Humanidade".
A Dieta Mediterránea responde a un estilo de vida que comprende un conxunto de coñecementos, prácticas e tradicións relacionadas cos cultivos, as colleitas, as receitas culinarias, as celebracións e as comidas compartidas familiarmente e en sociedade. Non só é un modelo alimenticio, senón que desempeña un factor de cohesión social e de respecto á diversidade. Foi declarada Patrimonio Inmaterial da Humanidade en 2010, nunha denominación conxunta que comprende a España, Chipre, Croacia, Grecia, Italia, Marrocos e Portugal. A alimentación baséase, principalmente, no consumo de froitas, verduras, legumes, cereais, froitos secos e aceite de oliva; todos eles propios da área mediterránea.
O selo fai referencia a estes produtos e destaca sobre eles unha gota de aceite en relevo e imprimida con verniz, que simula a textura e o aspecto oleaxinoso.